M. Tarıverdıev atyndaǵy VII Halyqaralyq organshylar konkýrsynyń alǵashqy azııalyq týry Astanada ótedi
TANA. 1 qyrkúıek. QazAqparat /Jasulan Amanbaıuly/ - Erteń Astanada Qazaq ulttyq mýzyka akademııasynda Mıkael Tarıverdıev atyndaǵy VII Halyqaralyq organshylar konkýrsynyń azııalyq týry bastalady.
Osymen jetinshi ret ótip jatqan konkýrstyń Azııa týryna Qazaqstannan jeti jáne Koreıa Respýblıkasy men Japonııadan bir-bir úmitkerden qatysady.
«Mıkael Tarıverdıev meıirimdilik qorynyń» prezıdenti, konkýrstyń art-dırektory Vera Tarıverdıevanyń aıtýynsha, bunyń aldynda Máskeýde, Kanzas pen Gambýrgte konkýrstyń amerıkalyq jáne eýropalyq týrlary ótken. Eki kúnge sozylatyn Astanadaǵy kezeń aıaqtalysymen Reseıdiń Kalınıngrad qalasynda baıqaýdyń aqtyq syny bastalady.
V. Tarıverdıevanyń atap ótkenindeı, atalmysh baıqaýdyń tarıhynda azııalyq týr tuńǵysh ret ótkizilgeli otyr jáne onyń Astanada uıymdastyrylýyna QR Prezıdenti N. Nazarbaev tikeleı atsalysqan.
«Astana - Qazaqstannyń jas elordasy retinde, qarqyndy damý jolyna túsip, jańa ıdeıalardyń oshaǵyna aınalǵan qala retinde azııalyq týrdyń ótkizilý ornyna óte laıyq dep taptym. Sondyqtan men Elbasyǵa baıqaýdy ótkizý jóninde usynys joldaǵan bolatynmyn. Kórip otyrǵanymyzdaı, ol usynys jolda qalǵan joq», - deıdi V. Tarıverdıeva.
«Men azııalyq týrdy ótkizý jónindegi armanymdy, usynysymdy jerge tastamaǵan Qazaqstan Prezıdenti Nursultan Nazarbaevqa alǵysymdy bildiremin», - deıdi ol.
M. Tarıverdıev atyndaǵy halyqaralyq baıqaýda álemniń tanymal organshylary - Djeıms Devıd Krıstı (AQSh), Okýbo Naomı (Japonııa), Ǵabıt Nesipbaev (QR), Lada Labzına (RF) qazylyq etpek. Shara uly sazgerdiń mereıtoıyna arnalǵan «Az ı ıA» kontsertimen támamdalady.
Eske sala keteıik, bıyl 15 tamyzda kópshilikke tanymal «Kóktemniń on jeti sáti», «Taǵdyr tálkegi nemese jeńil býyńyzben» fılmderine jáne taǵy da 130 kınofılmge mýzyka jazǵan sazger Mıkael Tarıverdıevtiń týǵanyna 80 jyl toldy. Tarıverdıev organ mýzykasymen qatar, kameralyq vokaldyq tsıklder, balet, opera janrynda da jazǵan.
