ІІM talapkerlerge qatysty jalǵan habarlamalar tarap jatqanyn eskertti
ASTANA. KAZINFORM — Іshki ister mınıstrligi vedomstvolyq oqý oryndaryna qabyldaý týraly jalǵan SMS-habarlamalardan saqtandyrdy.
Іshki ister mınıstrligi talapkerlerdiń ІІM-niń vedomstvolyq bilim berý uıymdaryna oqýǵa qabyldanǵany týraly jalǵan SMS-habarlamalardyń tarap jatqanyn habarlady.
— Atalǵan habarlamalar — jalǵan aqparat jáne olardyń Іshki ister mınıstrligine eshqandaı qatysy joq. Qazirgi ýaqytta qabyldaý naýqany áli de jalǵasyp jatyr. Іrikteýdiń barlyq kezeńi aıaqtalǵan joq. Qabyldaý belgilengen merzimge sáıkes, 15–25 shilde aralyǵynda júzege asyrylady. Qabyldaý naýqanynyń qorytyndy nátıjeleri konkýrstyq irikteýdiń barlyq kezeńi aıaqtalyp, qabyldaý komıssııalary tıisti sheshim qabyldaǵannan keıin ǵana «Qyzmet police» aqparattyq júıesindegi talapkerdiń jeke kabınetinde jarııalanady, — dedi tártip saqshylary.
Vedomstvo málim etkendeı, «Qyzmet police» aqparattyq júıesi talapkerlerdiń oqýǵa qabyldanǵany týraly SMS-habarlamalar jibermeıdi.
— Osyǵan baılanysty azamattardy mundaı habarlamalarǵa senbeýge, olardaǵy siltemelerge ótpeýge, jeke derekterin jarııa etpeýge jáne tek Іshki ister mınıstrliginiń resmı aqparatyna ǵana súıenýge shaqyramyz, — dep eskertti mınıstrlik.
Buǵan deıin Quryltaı saılaýy aldynda jalǵan akkaýnttar men feık aqparat kóbeıgenin jazǵanbyz.
