ІІM suranysqa ıe 5 qyzmet túrin atady

ASTANA. KAZINFORM – 2024 jyly polıtsııa turǵyndarǵa 12 mln memlekettik qyzmet kórsetti. Bul týraly Іshki ister mınıstrliginiń baspasóz hatshysy Shuǵyla Turlybek aıtty.

— Іshki ister organdary halyqqa memlekettik qyzmettiń 55 túrin kórsetedi. Kishigirim túrlerin qosa eskersek, olardyń sany 122-ge jetedi. 2024 jyly polıtsııa turǵyndarǵa 12 mln memlekettik qyzmet kórsetti, — dedi ol vedomstvonyń baspasóz qyzmeti alańynda ótken brıfıngte.

Onyń atap ótýinshe, eń kóp suranysqa ıe 5 qyzmet túri mynalar:

• jeke basty kýálandyratyn qujattardy berý;
• turǵylyqty jeri boıynsha tirkeý jáne tirkeýden shyǵarý;
• avtokólikti rásimdeý;
• elde ýaqytsha turýǵa ruqsat;
• jáne júrgizýshi kýáligin berý kiredi.

— Qazirgi ýaqytta ІІM-niń barlyq derlik qyzmeti avtomattandyrylǵan. Bul olardy az ýaqyt ishinde alýǵa múmkindik berdi. Mysaly, eger buryn tólqujattar men jeke kýálikter eki aı ishinde berilse, qazir bul merzim 15 jumys kúnine deıin qysqartyldy. Al qujattardy daıyndaý ortalyqtary bar Astana, Almaty, Shymkent jáne Aqtóbe qalalarynda ótinish berýshi jedeldik úshin arnaıy túbirtekti tólep, qujattardy bir jumys kúni ishinde ala alady, — dedi Shuǵyla Turlybek.

Mınıstrlik ókili Qazaqstanda turaqty turatyn sheteldikterge elde turýǵa yqtııarhat berý jáne azamattyǵy joq adamdarǵa kýálik berý merzimi eki aptaǵa (30 táýlikten 17 táýlikke deıin), Qazaqstan Respýblıkasynyń vızalaryn berý boıynsha qabyldaýshy tulǵalardyń shaqyrýlaryn qaraý jáne kelisý toǵyz kúnge (14 táýlikten 3 táýlikke deıin) qysqartylǵanyn aıtady.

— Sondaı-aq, avtokólikti qaıta tirkeý ýaqyty úsh jumys kúninen 90 mınýtqa deıin jáne júrgizýshi kýáligin aýystyrý bir jumys kúninen 40 mınýtqa deıin azaıtyldy, — dedi ol.

Buǵan deıin tólqujatty tegin alatyn azamattardyń 9 sanatyn jazǵan edik.