ІІM: sońǵy bes jylda kámeletke tolmaǵandarǵa qatysty qylmys sany azaıdy
ASTANA. KAZINFORM — Qazaqstanda kámeletke tolmaǵandarǵa qatysty jasalatyn qylmystardyń sany turaqty túrde tómendep keledi. Bul týraly Ortalyq kommýnıkatsııalar qyzmetinde ótken dóńgelek ústel barysynda QR ІІM Ákimshilik polıtsııa komıteti tóraǵasynyń orynbasary Alekseı Mılıýk málimdedi.
— Sońǵy bes jylda kámeletke tolmaǵandarǵa qatysty qylmystar sany azaıdy. Al bıyl balalarǵa qarsy jynystyq qylmystardyń tirkelýi 21%-ǵa tómendedi. Bul zańnamany kúsheıtýdiń naqty nátıjesi, — dedi Alekseı Mılıýk.
Vedomstvo ókiliniń aıtýynsha, Іshki ister mınıstrligi quqyq buzýshylyqtyń aldyn alýǵa baǵyttalǵan jańa zań jobasyn ázirlegen. Atalǵan qujatta jasóspirimder qylmysynyń aldyn alý jeke blok retinde qarastyrylyp otyr.
— Jańa zań jobasy aıasynda kámeletke tolmaǵandarǵa quqyqtyq, áleýmettik, psıhologııalyq jáne pedagogıkalyq kómek kórsetý boıynsha memlekettik organdardyń quzyreti qaıta qaralady. Sondaı-aq profılaktıkalyq baqylaýǵa alynatyn adamdardyń sanattary jańartylyp jatyr. Qazirgi ýaqytta zań jobasy Parlament Májilisiniń qaraýynda, — dedi spıker.
Budan bólek, jyl saıyn ІІM organdarynyń profılaktıkalyq sharalarymen 5 myńnan astam jasóspirim jáne 6 myńnan astam ata-ana qamtylady. Olar bala tárbıesi jónindegi mindetterdi oryndamaıtyndar sanatyna jatady.
Mınıstrlik ókilderi kámeletke tolmaǵandarǵa qatysty qylmystyń aldyn alý úshin tıisti organdardyń ózara is-qımyly men ata-analardyń jaýapkershiligin arttyrý mańyzdy ekenin atap ótti.
Buǵan deıin, Astanada kámeletke tolmaǵan baladan aqsha bopsalaǵandar 10 jylǵa sottalǵanyn jazǵanbyz.