ІІM shomylý maýsymynda qaýipsizdik talaptaryn qatań saqtaýǵa shaqyrdy
ASTANA. KAZINFORM — Іshki ister mınıstrligi ata-analar men balalardy shomylý maýsymynda qaýipsizdik erejelerin saqtaýǵa shaqyrdy. Bul týraly Polisia.kz jazdy.
— Qurmetti ata-analar men zańdy ókilder! Jazǵy demalys kezeńinde balalardyń qaýipsizdigi Іshki ister mınıstrliginiń basty nazarynda. Polıtsııa ata-analardy kámeletke tolmaǵandarǵa ruqsat etilmegen jáne qaýipsizdik talaptaryna saı kelmeıtin jerlerde shomylýyna jol bermeýge shaqyrady. Belgilenbegen jerlerde sýǵa túsý ÁQBtK-niń 364-babyna sáıkes ortaq sý paıdalaný qaǵıdalaryn buzý bolyp tabylady jáne ákimshilik jaýapkershilikke ákep soǵady. Qazirgi ýaqytta óńirlerde jasóspirimderdiń sýǵa abaısyzdan batý saldarynan qaıǵyly jaǵdaılar tirkelýde. Osyǵan baılanysty sýdaǵy qaýipsizdik talaptaryn qatań saqtaý qajet. Olardy elemeý aýyr saldarǵa ákelýi múmkin. Sonymen qatar jaz mezgilinde quqyq buzýshylyqtardyń aldyn alý maqsatynda Іshki ister mınıstrligi «Túngi qaladaǵy balalar» jedel-profılaktıkalyq is-sharasyn ótkizedi. Jasóspirimderdiń túngi ýaqytta qaraýsyz júrýiniń aldyn alý jumystary kúsheıtiledi. Osy oraıda ІІM ata-analardy balalardyń bos ýaqytyn tıimdi uıymdastyryp, olardyń qaýipsiz ári jaýapty demalysyn qamtamasyz etýge shaqyrady. Quqyq buzýshylyq faktileri anyqtalǵan nemese olarǵa kýá bolǵan jaǵdaıda 102 nómirine habarlasýyńyzdy ótinemiz, — dedi ІІM ákimshilik polıtsııa komıtetiniń aǵa ınspektory Botakóz Jalekeshova.
Aıta keteıik, elorda qutqarýshylary táýlik boıy kezekshilikke kóshti.
