M.Shoqaıdyń bul muralaryn kezinde Tahır Shaǵataı saqtaýǵa tapsyryp edi - M.Akchora
ALMATY. Shildeniń 8-i. QazAqparat /Ádilet Musahaev/ - 1975-1976 jyldary qyrym tatarlarynyń birneshe kórnekti ókilderimen tanystym, olardyń ishinde M.Shoqaıdyń sońǵy kúnderine deıin janynda bolǵan Tahır Shaǵataı da bar edi. Bul jaıynda búgin M.Shoqaıdyń qujattaryn birneshe jyldar boıy saqtap kelgen Muzaffer Akchora málim etti,
dep habarlaıdy QazAqparat.
M.Akchora sol kezderi Túrkistan ortalyq qozǵalysynyń muraǵatyna kirýge T.Shaǵataı bastaǵan adamdar ruqsat bergendigin aıta kele, búgingi qolymyzǵa tıip otyrǵan qujattardy Tahır Shaǵataı saqtaýǵa bergendigin jetkizdi. «Kóp jyldary eki el arasyndaǵy qarym-qatynas saıası jaǵdaılarǵa baılanysty úzilip qaldy, ári Qazaqstan M.Shoqaıdy zertteıtin halde emes edi. Bertin kele «TÚRKSOI» halyqaralyq uıymy jumystarynyń jetistikterimen tanysa kele, qujattardy osynda tapsyrýǵa bel býdym. Bul qujattardy Dúısen Qaseıinovtyń usynysy boıynsha túrki elderiniń túpki ordasy, qazirgi qazaq eliniń Ortalyq memlekettik muraǵatyna berýdi jón kórdim», deıdi Muzaffer Akchora.
Sondaı-aq ol óz atalarynyń Qyrymnan 1900 jyldary Túrkııaǵa kóshkendigin aıta kele, búkil túrki halyqtaryn týysy retinde qurmetteıtinin aıtady. «Qazaqstan degen kezde oıyma ár ýaqytta qypshaq, ǵun, úısinderdiń shyqqan uly dalasy, búkil túrki memleketteriniń qurylǵan jeri retinde atameken elesteıdi», dep atap ótti ol óz sózinde.
M.Akchora sonymen qatar Qazaqstannyń ár jetistigine qýanyp, onyń qaryshtap damýyn ylǵı da tilep otyratyndyǵyn aıtty.
