M. Shoqaı jónindegi shetel arhıvterindegi qujattar Astanadaǵy kórmege shyǵaryldy (FOTO)
ASTANA. QazAqparat - Qazaqstan Respýblıkasynyń Ulttyq muraǵatynda qazaq memlekettik jáne qoǵam qaıratkeri, oıshyl, ǵalym, Túrkistan halyqtarynyń kósemi Mustafa Shoqaıdyń 125 jyldyǵyna oraı «Mustafa Shoqaı: Alash arysy» atty qujattyq kórmesi ashyldy.
«Kórmede alǵash ret Mustafa Shoqaıdyń ómiri men qyzmetine qatysty Armenııa, Vengrııa, Mysyr, Iran, Qytaı, Polsha, Reseı, AQSh, Túrkııa, Ózbekstan, Frantsııa muraǵattary, kitaphanalary men ǵylymı ortalyqtarynan alynyp, Qazaqstan Respýblıkasy Ulttyq muraǵatynyń №83 qorynda saqtalatyn jáne kórnekti qoǵam qaıratkerleriniń jeke qorlarynan alynǵan muraǵattyq qujattardyń túpnusqalary men kóshirmeleri qoıylady», - deıdi Ulttyq muraǵattyń ókilderi.
Muraǵattyń baspasóz qyzmeti atap ótkendeı, Mustafa bastaýysh bilimdi aýylda ata-anasynan alyp, Tashkenttegi orys gımnazııasyn jáne Peterbor ýnıversıtetiniń zań fakýltetin úzdik bitirgen. Mustafa Shoqaı Memlekettik Dýmanyń Musylman fraktsııasy Saıası bıýrosynda Túrkistan halyqtarynyń birden-bir ókili bolǵan. Gýmanıst-oıshyl, demokrat, entsıklopedııalyq bilim ıesi, aǵartýshy Mustafa Shoqaı Orta Azııa men Qazaqstan halyqtary tarıhy men mádenıetiniń joqtaýshysy boldy, aǵylshyn, frantsýz, nemis, túrik jáne arab tilderin óte jetik meńgergen. Búkil ǵumyryn ol Orta Azııa men Qazaqstan halyqtarynyń ar-abyroıyn qorǵaýǵa, shyndyq úshin kúreske arnady. Uly Otan soǵysy bastalysymen natsıster Parıjde barlyq aldyńǵy qatarly orys emıgranttaryn tutqyndap, Kompen kontslagerine jiberdi. Olardyń ishinde Shoqaı da boldy. Úsh aptadan keıin ony Berlınge ákelip, quramyna tutqyndalǵan keńes túrikteri alynatyn Túrkistan legıonyn basqarýǵa úgittegen. Mustafa Shoqaı 1941 jyldyń 27 jeltoqsanynda osy lagerlerdiń birinde dúnıeden ótti.
