ІІM Shymkent polıtsııasyn qatań baqylaýǵa aldy: tekseris bastalyp, basshylar qyzmetten ketti
ASTANA. KAZINFORM — Mınıstr Erjan Sadenov Shymkent qalasynyń polıtsııa departamentinde kóshpeli keńes ótkizdi, dep habarlaıdy ІІM baspasóz qyzmeti.
Keńeske qala ákimi Ǵabıt Syzdyqbekov, qalalyq quqyq qorǵaý jáne arnaıy organdardyń birinshi basshylary, sondaı-aq jergilikti atqarýshy organdardyń ókilderi qatysty.
Jıyn barysynda ІІM basshysy jeke quramǵa Shymkent qalasy polıtsııa departamentiniń jańa basshysy Muhtar Qojaevty tanystyrdy. Ol buǵan deıin ІІM tergeý departamentin basqarǵan. Polıtsııa general-maıorynyń basqarýshylyq jáne tergeý salasynda mol tájirıbesi bar ekeni, tergeýshiden bastap ortalyq apparat departamentiniń basshysyna deıingi qyzmet jolynan ótkeni atap ótildi.
Mınıstr departamenttiń jańa basshylyǵynyń aldynda turǵan negizgi mindetterdi aıqyndap, megapolıstegi krımınogendik jaǵdaıǵa baılanysty alańdaýshylyq bildirdi.
Eske sala keteıik, buǵan deıin Ulttyq quryltaı barysynda Memleket basshysy Shymkenttegi sońǵy oqıǵalarǵa baılanysty Іshki ister mınıstrligine birqatar tapsyrma bergen bolatyn. Qyzmettik tekserý qorytyndysy boıynsha quqyqtyq tártipti tıisti deńgeıde qamtamasyz etpegeni úshin polıtsııa departamentiniń bastyǵy men onyń birqatar orynbasary qyzmetterinen bosatylyp, sondaı-aq aýdandyq bólinisterdiń jekelegen basshylary ishki ister organdarynan shyǵaryldy.
Kún tártibindegi basty máselelerdiń biri qoǵamdyq qaýipsizdikti qamtamasyz etý jáne qylmysqa qarsy is-qımyl sharalaryn kúsheıtý, sondaı-aq polıtsııa qataryndaǵy tártipti nyǵaıtý boldy. Mınıstr eń aldymen qyzmettik tártip pen zańdy saqtaýǵa erekshe nazar aýdardy. Jumystaǵy júıeli kemshilikter kórsetilip, qylmystarǵa ýaqtyly den qoıý jáne sybaılas jemqorlyq faktilerine jol bermeý jóninde qatań ustanym bildirildi.
— Tártip joq jerde nátıje joq, senim joq, bedel quldyraıdy. Árbir buzýshylyq úshin barlyq deńgeıdegi basshylar men kásibı boryshyna opasyzdyq jasaǵandardyń árqaısysy jeke jaýap beredi, — dep atap ótti Erjan Sadenov.
Sońǵy kezeńdegi jedel qyzmettiń qorytyndylary qylmystyń árbir túri boıynsha qaralyp, olardyń jasalýyna yqpal etken sebepter men jaǵdaılarǵa taldaý jasaldy. Qylmystyq isterdi tergeý sapasyna erekshe kóńil bólindi. Osy jyldyń rezonansty oqıǵalary boıynsha tergeý is-sharalarynyń barysy týraly aqparat tyńdaldy. Nuraı Serikbaıdyń ólimine qatysty is erekshe baqylaýda. Mınıstr tergeý-jedel bólinisterine jan-jaqty, tolyq jáne obektıvti tergeýdi qamtamasyz etýdi tapsyryp, barlyq kináli tulǵa zań negizinde ádil jazasyn alýy tıis ekenin atap ótti.
Odan bólek ІІM basshysy qylmystyq quqyq buzýshylyqtyń jańa quramy retinde stalkıngke qarsy is-qımyl máselesine arnaıy toqtaldy. Biryńǵaı áreket etý algorıtmin ázirleý, tergeýshilerdi mundaı qylmystardy tergeý tájirıbesine oqytý jáne formalızmge jol bermeý tapsyryldy. Qysym kórsetý, qorqytý jáne qýdalaý týraly kez kelgen sıgnaldar der kezinde anyqtalyp, tragedııalyq saldarǵa ulasqannan keıin emes, ýaqtyly quqyqtyq baǵa alýy tıis ekeni basa aıtyldy.
Keńes aıasynda departament basshylyǵy, salalyq basqarmalar men polıtsııanyń aýdandyq bólinisteriniń basshylary tyńdaldy. Uıymdasqan qylmysqa qarsy is-qımyl jumysy qatań synǵa alyndy. ІІM basshysy beıindi bólinistiń qyzmetindegi eleýli olqylyqtardy, jumystyń álsiz uıymdastyrylýyn jáne naqty nátıjelerdiń joqtyǵyn atap ótip, qylmystyq toptardy áshkereleý men asa qaýipti qylmystardyń jolyn kesý qajettigin atap ótti.
Anyqtalǵan kemshilikterdi eskere otyryp, kadrlyq sheshimder qabyldandy. Qyzmettik mindetterin tıisinshe oryndamaǵany úshin Uıymdasqan qylmysqa qarsy kúres basqarmasynyń bastyǵy jáne onyń bólimderiniń biriniń basshysy qyzmetterinen bosatyldy. Quqyq buzýshylyqtardyń aldyn alý máselesine de erekshe nazar aýdaryldy. Mınıstr profılaktıkalyq jumysty jandandyrýdy, esepte turǵan tulǵalarǵa baqylaýdy kúsheıtýdi, táýekel toptarymen jumysty arttyrýdy, sondaı-aq qylmystyń aldyn alý salasyndaǵy túpki nátıjeler úshin basshylardyń jaýapkershiligin kóterýdi talap etti.
Sonymen birge jol-kólik oqıǵalarynyń sanyn azaıtý boıynsha keshendi sharalar qabyldaýdy, Jol qozǵalysy erejeleriniń saqtalýyna baqylaýdy kúsheıtýdi, syrtqy qyzmetter men jedel basqarý ortalyǵynyń jumysyn jetildirýdi, sondaı-aq quqyqtyq tártipti qamtamasyz etý qyzmetine zamanaýı tsıfrlyq sheshimderdi belsendirek engizýdi tapsyrdy.
Mınıstrdiń nusqaýymen qalalyq polıtsııa bólinisterinde ІІM-niń keshendi ınspektorlyq tekserisi bastaldy. Komıssııa quramyna ortalyq apparattyń negizgi qyzmetteriniń ókilderi engizilip, olarǵa departament pen onyń aýdandyq bólimderiniń qyzmetin jan-jaqty zerdeleý, jiberilgen buzýshylyqtardyń sebepterin anyqtaý jáne olardy joıý boıynsha naqty usynystar berý tapsyryldy.
Jumys sapary aıasynda mınıstr ishki ister organdarynyń ardagerlerimen kezdesti. Ol jas qyzmetkerlerdiń kásibı jaýapkershiligin qalyptastyrýda jáne quqyqtyq tártipti nyǵaıtýda tálimgerlik ınstıtýtynyń mańyzyn atap ótti.
Buǵan deıin Shymkentte 21 jastaǵy boıjetkendi óltirgen kúdikti ómir boıyna bas bostandyǵynan aıyrylýy múmkin ekenin jazǵanbyz.