ІІM sheteldikter men azamattyǵy joq tulǵalardyń JSN rásimdeý tártibine ózgeris engizbek

Іshki ister mınıstrligi sheteldikter men azamattyǵy joq tulǵalardyń JSN rásimdeý tártibine ózgeris engizýdi kózdeıtin buıryq jobasyn «Ashyq NQA» portalynda qoǵam talqylaýyna shyǵardy, dep habarlaıdy Kazinform agenttigi.

«Sheteldikter nemese azamattyǵy joq tulǵalar JSN qalyptastyrý úshin qyzmet berýshige kelgen jeri boıynsha Memlekettik korporatsııa (Halyqqa qyzmet kórsetý ortalyqtary – red.) arqyly tıisti qujattardy qosa bere otyryp, ótinish berý jolymen jeke ózi júginedi», - delingen buıryq jobasynda.

Al Qazaqstan sotynyń úkimi boıynsha bas bostandyǵynan aıyrylǵan sheteldikterdiń, azamattyǵy joq adamdardyń jáne rettelmegen mártebesi bar adamdardyń jeke basyn kýálandyratyn qujattary bolmaǵan kezde memlekettik qyzmetti alý úshin bekitilgen úlgi boıynsha ótinish beredi.

Al buǵan deıin JSN alyp úlgergen sheteldikter, azamattyǵy joq tulǵalar qujatyn túzetý úshin jeke tulǵanyń ózi (nemese onyń zańdy ókili) kelgen jeri boıynsha Memlekettik korporatsııa arqyly úlgi boıynsha ótinish túsirý kerek.

Memlekettik korporatsııa qyzmetkeri qyzmet alýshy júgingen kezde:

1) qyzmetti alýshynyń jeke basyn sáıkestendiredi;

2) qujattardy jáne onda kórsetilgen málimetterdiń durystyǵyn, ótkizgen qujattardyń tizimge sáıkestigin tekseredi;

3) HQKO-nyń biryńǵaı aqparat júıesinde ótinimdi resimdeıdi.

«JSN qalyptastyrý boıynsha memlekettik qyzmetti usynǵan jaǵdaıda, «Búrkit» biryńǵaı aqparat júıesimen ıntegratsııalaý arqyly HQKO biryńǵaı aqparat júıesine sheteldiktiń jáne azamattyǵy joq adamnyń tólqujat nómiri avtomatty túrde engiziledi. Sheteldik týraly anyqtalǵan derekter toltyrylyp, onyń Qazaqstan Respýblıkasynyń memlekettik shekarasyn kesip ótý týraly fakti tekseriledi», - dep jazylǵan qujatta.

JSN alýǵa ótinish berýshi sheteldik nemese azamattyǵy joq tulǵa tıisti qujattar toptamasyn tolyq usynbasa nemese qoldanylý merzimi ótken qujattardy usynǵan jaǵdaıda Memleketitk korporatsııa ótinishti qabyldaýdan bas tartyp, qolhat beredi.