ІІM sheteldik áriptesterimen «Іzdestirý» operatsııasyn júrgizdi: 300-ge jýyq qylmysker ustaldy
ASTANA. KAZINFORM – TMD elderiniń ІІM-terimen birge izdeýde júrgen adamdardy ustaý, sondaı-aq habar-osharsyz ketkenderdi anyqtaý boıynsha jedel-profılaktıkalyq is-shara ótkizildi.
Qyrǵyz Respýblıkasynyń ІІM-men ózara is-qımyl barysynda Bishkek qalasynda 39 jastaǵy qazaqstandyq azamat ustaldy. Ol 13 jyl buryn Jambyl oblysynda jasalǵan toptyq zorlaýǵa qatysqany úshin izdeýde júrgen.
Reseı Federatsııasy ІІM Qylmystyq izdestirý bas basqarmasymen yntymaqtastyq nátıjesinde Sochıde 22 jastaǵy qazaqstandyq azamat ustaldy. Ol Jetisý oblysynyń aýmaǵynda birqatar ınternet-alaıaqtyq jasaǵannan keıin jasyrynyp kelgen.
Pavlodar oblysy PD jedel-izdestirý toby reseılik áriptesterimen birge Groznyıda 52 jastaǵy er adamdy ustady. Ol 1996 jyly Pavlodar oblysynyń Bobrovka aýylynda jergilikti turǵynǵa qaraqshylyq shabýyl jasaǵan.
Jambyl oblysy Qordaı aýdanynyń aýmaǵynda Ózbekstannyń 47 jastaǵy azamaty ustaldy. Ol óz jubaıyn óltirip, jasyrynyp júrgen.
Elordada Germanııanyń 58 jastaǵy azamaty ustaldy. Kúdikti Gambýrgte asa iri kólemde alaıaqtyq jasaǵany úshin óz eliniń Interpoly izdep júrgen. Odan bólek, adam ómirine qastandyq jasaǵany úshin Túrkııanyń quqyq qorǵaý organdary izdestirip júrgen 33 jastaǵy sheteldik ustaldy.
Ózbekstan ІІM-men birge jambyldyq polıtseıler Baızaq aýdanynda kórshi eldiń 46 jastaǵy azamatyn ustady. Ol 2009 jyldyń qańtarynan bastap adam saýdasy úshin izdeýde bolǵan.
Almaty oblysy PD qyzmetkerleri ótkizgen is-sharalardyń nátıjesinde Eńbekshiqazaq aýdanynda kisi óltirý qylmystary úshin izdeýde júrgen atalǵan aýdannyń 33 jastaǵy jáne 27 jastaǵy turǵyndary ustaldy.
Habar-osharsyz ketken 56 adamnyń, onyń ishinde 10 kámeletke tolmaǵan balanyń júrgen jeri anyqtaldy.
Mysaly, Túrkistan jáne Mańǵystaý oblystarynyń PD qyzmetkerleriniń birlesken jumysynyń arqasynda 31 naýryz kúni úıinen shyǵyp ketken 15 jasar qyz Aqtaýda tabyldy.
Jedel is-sharanyń eki kúniniń qorytyndysy boıynsha izdeýde júrgen 284 qylmysker ustaldy:
kisi óltirgeni úshin — 7;
densaýlyqqa aýyr zııan keltirgeni úshin — 9;
qaraqshylyq shabýyldar úshin — 6;
tonaý úshin — 5;
esirtki qylmystary úshin — 13.
Onyń ishinde respýblıkadan tys jerlerde 32, basqa elder úshin 164 qylmysker ustaldy.
Aıta ketelik terrorıstik jáne ekstremıstik qylmys jasaǵany úshin 34 adam sottaldy.