ІІM: Shetel azamattarynyń zańsyz kelýin uıymdastyrǵan adamdar qamaýǵa alyndy
ASTANA. KAZINFORM – Іshki ister mınıstrligi zańsyz kóshi-qon arnasyn toqtatty. Bul týraly ІІM baspasóz qyzmeti habarlady.
Krımınaldyq polıtsııa qyzmetkerleri birqatar óńirde zańsyz kóshi-qon arnalarynyń jolyn kesý, sondaı-aq Qazaqstan Respýblıkasynyń memlekettik shekarasyn zańsyz kesip ótý faktilerin anyqtaý boıynsha jedel-izdestirý is-sharalaryn ótkizdi.
Atap aıtqanda, 22 qańtarda Pavlodar oblysynda krımınaldyq polıtsııa qyzmetkerleri Qazaqstan azamattary men jaqyn shet elder azamattaryn ustady.
Olar syıaqy úshin Qazaqstan aýmaǵy arqyly memlekettik shekarany zańsyz kesip ótýdi uıymdastyrǵan.
26 qańtarda Soltústik Qazaqstan oblysynda respýblıkadan shyǵarylyp, elge kirýge tyıym salynǵan sheteldik azamat ustaldy. Ol tegin aýystyryp elge qaıta kirgen. Sol kúni Aqmola oblysynyń Qosshy qalasynda jalǵan qujattar jasaý arqyly shetel azamattarynyń Qazaqstanda bolýyn uıymdastyrǵan top ustaldy.
Jalpy kúdiktilerden avtokólikter, qarda júretin tehnıka, sheteldik pasporttar, flesh-kartalar, ártúrli orgtehnıka jáne medıtsınalyq mekemelerdiń mórleri tárkilendi.
Negizgi uıymdastyrýshylar sot sanktsııasymen qamaýǵa alyndy.
Atalǵan faktiler boıynsha Qylmystyq kodeksiniń 392-baby jáne 394-baby boıynsha sotqa deıingi tergep-tekserý júrgizilip jatyr.
Aıta ketelik Prezıdent kóshi-qon úderisterin jappaı tsıfrlandyrýdy óte ózekti másele retinde ataǵan edi.