M. Seısenbaev elge óz erkimen oralyp, tergeý isine kómektesip jatqanyn habarlady
ALMATY. 11 qarasha. QazAqparat /Erbol Azanbek/ - 25 qazan kúni elge oralǵan Alıans banktiń Dırektorlar keńesiniń burynǵy tóraǵasy Marǵulan Seısenbaev búgin Almatyda BAQ ókilderine arnaıy brıfıng ótkizdi.
Esterińizge sala keteıik M.Seısenbaev 1,5 jyl buryn Alıans banktiń top-menedjerleriniń ústinen qylmystyq is qozǵalýyna baılanysty shet eldegi demalys saparynan oralmaǵan bolatyn. Oǵan jáne Alıans banktiń bir top aktsıoneri men menedjerine qatysty birneshe aıyp taǵylyp, halyqaralyq izdeý jarııalanǵan edi. Bıylǵy jyldyń qyrkúıek aıynda M.Seısenbaev QR Bas prokýratýrasyna ótinish jasap, elge oralý nıetin bildirgen. Nátıjesinde halyqaralyq izdestirý toqtatylyp, qyrkúıektiń 25 kúni elge kelgen bolatyn.
Buǵan deıin BAQ ókilderine óziniń elge oralǵanyn hat arqyly ǵana habarlaǵan ol búgin jýrnalıstermen kezdesip, óz aýzymen elge oralý sebepterin baıandady. Sońǵy 2 jyldan beri qazaqstandyq jýrnalıster aldyna alǵash shyqqan ol Qazaqstanǵa erkimen oralǵanyn, banktiń aktsıonerleri men menedjmentine qarsy qozǵalǵan qylmystyq tergeý amaldaryna kómektesýge ázir ekendigin, ózine taǵylǵan aıyp boıynsha shyndyqty anyqtaý úshin jaýap berýge daıyndyǵyn atap ótti.
«Men banktiń aktıvin ornyna qoıý úshin jáne bıznes qaýymnyń aldynda bedelin kóterýge daıynmyn. Men elge oralǵan soń maǵan qatysty qylmystyq isti saıası maqsatta paıdalanyp, meni Elbasynyń saıasatyna qarsy qoıý maqsatynda kóptegen áreketter jasaldy. Internet saıttarda Elbasy men quqyq qorǵaý organdary, sot júıesine qarsy qoıýǵa baǵyttalǵan birqatar materıaldar jaryq kórdi. Keıbir jarııalanymdardy meniń esimim Rahat Álıev pen Muhtar Áblıazovtardyń attarymen qatar qoıylypty. Buǵan baılanysty aıtarym meniń olarǵa qatysym joq. Jáne bolǵan da emes. Men esh ýaqytta olardyń is-áreketin, kózqarasyn qoldaǵan emespin, esh ýaqytta oppozıtsııada bolǵan joqpyn. El Prezıdentine adal boldym jáne sol adaldyǵymda qala beremin. Qalaı men Elbasynyń saıasatyn qoldamaımyn, eger men alys aýylda kópbalaly otbasynan shyǵyp, jaqsy bilim alyp, Qazaqstanda iri bıznes qurylymyn qalyptastyrdym. Bıznesmen jáne azamat retinde óz keleshegimdi Qazaqstannyń bolashaǵymen baılanystyramyn jáne budan keıin de el ıgiligi úshin eńbek etýge daıynmyn,- degen bankır tergeý organdaryna kómektesýge daıyndyǵyn, osyǵan oraı tergeý ádil, obektıvti júretindigine senim bildirdi.
Sondaı-aq ol óz sózinde shetelde qashyp júrgenderdiń barlyǵyn elge oralyp, tergeýge kómek jasaýǵa shaqyrdy. «Olardyń Qazaqstannan tysqary júrýi ózderiniń jaǵdaıyn odan ary qıyndata beretindigin eskertkim keledi»,-dedi M.Seısenbaev.
Aldaǵy jarty jyldaǵy jumysym prokýratýra men qarjy polıtsııasynyń tergeý sharalaryna qatysý degen ol, BAQ-ta jańa bank ashypty degen aqparattyń jalǵandyǵyn, bolashaqta óziniń bank bıznesimen aınalysýdy josparlamaıtynyn jetkizdi.
