M.Saakashvılı Grýzııa azamattyǵynan aıyryldy
BAKÝ-TBILISI. QazAqparat - Grýzııa Prezıdenti Georgıı Margvelashvılı Mıhaıl Saakashvılıdi azamattyǵynan aıyrý jónindegi jarlyqqa qol qoıdy, dep habarlaıdy Bakýdegi QazAqparat tilshisi Berik Hamıtov respýblıka prezıdentiniń baspasóz qyzmetine silteme jasap.
3 jeltoqsanda Grýzııanyń Ádilet mınıstrligi el prezıdentine M.Saakashvılıdi grýzııalyq azamattyqtan aıyrý usynysyn jasady.
Bul týraly Ádilet mınıstri Teıa Tsýlýkıanı málimdedi.
«Biz Mıhaıl Saakashvılıge onyń azamattyǵyn toqtatý boıynsha óz ustanymyn aıtýdy usyndyq. Grýzııa zańynda qarastyrylǵandaı, buǵan 1 aıdaı ýaqyt beriledi, - dedi mınıstr. - Hat oǵan Odessada 3 qarashada berildi. Ol jaýap qaıtarmady. Sondyqtan Ádilet mınıstrliginiń qorytyndysy prezıdent G.Margvelashvılıge joldandy» - dedi T.Tsýlýkıanı.
M.Saakashvılı 2004 jyldyń qańtarynan 2013 jylǵy qarashaǵa deıin Grýzııa Prezıdenti laýazymynda boldy. 2015 jyldyń mamyrynda M.Saakashvılıge Ýkraına azamattyǵy berildi. Al 30 mamyrda ol Odessa oblysynyń gýbernatory bolyp taǵaıyndaldy.
