ІІM: Іri zaýyttardaǵy urlyq shemalary áshkerelendi
ASTANA. KAZINFORM — Pavlodar oblysy polıtsııa departamentiniń uıymdasqan qylmysqa qarsy kúres basqarmasy Alıýmınıı zaýyty aýmaǵynan metall urlaý shemasyn anyqtady.
Іshki ister mınıstrligi óndiris obektilerinde urlyq jasaýdyń shemalaryn anyqtaý jáne olardyń jolyn kesý boıynsha júıeli jumysty jalǵastyryp jatyr.
Polisia.kz-tiń málimetinshe qylmys jasady degen kúdikke kásiporynnyń qyzmetkerleri ilindi. Olardyń zańsyz áreketi jedel is-sharalar nátıjesinde qujattaldy. Fıgýranttar metaldyń kezekti partııasyn shyǵarý kezinde qylmys ústinde ustaldy.
Olardyń is-áreketterinen kásiporynǵa 30 mln teńge somasynda shyǵyn keltirildi. Qylmystyq is urlyqtyń birneshe epızodtary boıynsha tergelip jatyr.
Ulytaý oblysynda uıymdasqan qylmysqa qarsy kúres basqarmasy «Qazaqmys» korporatsııasynyń qaýipsizdik qyzmetimen birlesip, kórsetilgen kásiporynnyń jumyskerlerinen turatyn eki top ustady. Olar taýarlyq-materıaldyq qundylyqtardy urlaý shemasyn uıymdastyrǵan.
– Birinshi jaǵdaıda top músheleriniń biri ýchaske bastyǵy. Olar 16 mln teńgeden astam somaǵa kásiporyn múlkin urlaǵan. Ekinshi topta qylmystardy jasaýǵa korporatsııa basqarmalarynyń biriniń basshysy qatysqan. Olar urlanǵan zattardy kásiporyn aýmaǵynan qujattardy qoldan jasaý arqyly shyǵaryp otyrǵan. Atalǵan faktiler boıynsha fıgýranttardyń quqyqqa qarsy áreketteri týraly dálelder jınaldy. Barlyq kúdiktiler ustaldy, – dedi ІІM uıymdasqan qylmysqa qarsy kúres departamentiniń ókili Qýandyq Alpys.
Sotqa deıingi tergep-tekserý adamdar tobymen aldyn ala sóz baılasý arqyly jasalǵan urlyq faktileri boıynsha júrgizilýde.
– Sondaı-aq «Qarmet» AQ-dan múlik urlaýdy uıymdastyrǵany úshin 2023 jyly ustalǵan toptardyń biriniń músheleri uzaq merzimge sottalǵanyn atap ótý qajet. Osy kásiporynda urlyq jasaǵan basqa da eki uıymdasqan qylmystyq topqa qatysty tergeý aıaqtaldy. Qylmystyq ister sotqa jiberildi. Іri ónerkásip obektilerinde uıymdasqan qylmystyq toptardyń krımınaldyq áreketteriniń jolyn kesý jónindegi jumys Іshki ister mınıstrliginiń baqylaýynda, – dedi spıker.
Aıta ketelik Cot saraptamalary ortalyǵy basshylarynyń ústinen is qozǵalǵan edi.