ІІM Prezıdenttiń halyqqa Joldaýynda aıtqan tapsyrmalaryn iske asyrýǵa kiristi

ASTANA. KAZINFORM — Іshki ister mınıstrliginde Memleket basshysynyń «Jasandy ıntellekt dáýirindegi Qazaqstan: ózekti máseleler jáne ony túbegeıli tsıfrlyq ózgerister arqyly sheshý» atty Joldaýynda belgilengen mindetterdi oryndaý boıynsha jedel keńes ótti. Bul týraly Polisia.kz jazdy.

Vedomstvo qoǵamdyq qaýipsizdikti nyǵaıtýǵa, protsesterdi tsıfrlandyrýǵa, ınfraqurylymdy jańǵyrtýǵa jáne quqyq qoldaný tájirıbesiniń tıimdiligin arttyrýǵa baǵyttalǵan bastamalardy iske asyrýǵa kiristi. 

Mınıstr Erjan Sadenov zań pen quqyqtyq tártipti qamtamasyz etý — qaýipsiz ári turaqty memleket qurýdyń negizi ekenin atap ótti.

— Prezıdent atap ótkendeı, tártip pen zańdylyqsyz zamanaýı ári órkendegen qoǵam qurý múmkin emes. Bizdiń basty mindetimiz — Zań men Tártipti qamtamasyz etý, qoǵamda barlyq quqyq buzýshylyqtarǵa nóldik tózimdilik qalyptastyrý, — dedi mınıstr.

Keńes barysynda vedomstvo basshysy jeke quramǵa naqty tapsyrmalar júktedi. Erekshe nazar zorlyq-zombylyq pen qoǵamǵa jat minez-qulyqtyń aldyn alýǵa, quqyq buzýshylyqtar jıi tirkeletin oıyn-saýyq oryndarynyń qyzmetine baqylaý júrgizýge aýdaryldy.

Qyzmet basshylary men aýmaqtyq bólinisterge ákimdiktermen birlesip, mundaı oryndarǵa taldaý júrgizip, qaıtalanatyn oqıǵalardyń aldyn alý jumysyn kúsheıtý tapsyryldy. Sondaı-aq mal urlyǵynyń aldyn alý toptarynyń jumysyn jandandyrý, aýyldyq jerlerde reıdter ótkizý, Aýyl sharýashylyǵy mınıstrligimen birlesip, maldy chıpteý máselesin jedel pysyqtaý tapsyryldy.

Kólik-logıstıka salasynda mınıstr tranzıttik kólikterdi negizsiz toqtatýǵa jol bermeýdi jáne temirjol joldaryndaǵy konteınerlik tasymaldardyń qaýipsizdigin qamtamasyz etýdi talap etti. Jol qaýipsizdigi máselesi jeke qaraldy. Bul salaǵa jasandy ıntellektti qoldaný arqyly tsıfrlyq sheshimder engizilmek. 

Mınıstr aýmaqtyq departamentterge jol-kólik oqıǵalary jıi bolatyn ýchaskelerdi qamtı otyryp, aýdandarda profılaktıkalyq sharalar júrgizýdi, samokattar belsendi qoldanylatyn jerlerde patrýldeýdi kúsheıtýdi jáne ákimdiktermen birlesip, arnaıy ınfraqurylym qurý boıynsha usynystar daıyndaýdy tapsyrdy. Kıberqylmyspen kúres aıasynda barlyq bólinister jańa zańnamalyq normalardyń kúshine enýine baılanysty quqyq qoldaný tájirıbesine tolyq daıyn bolýy tıis. Bul dropperlerdiń áreketteri úshin jaýapkershilik, onlaın nesıe berýdi shekteý jáne SIM-kartalardyń aınalymyn retteý sekildi máselelerdi qamtıdy.

Investıtsııalyq klımatty jaqsartý maqsatynda kóshi-qon qyzmeti men aýmaqtyq bólinisterge ınvestorlyq vızalardy ýaqtyly berýdi qamtamasyz etý jáne bıznesti zańsyz tekserýlerdi shekteý tapsyryldy.

Týrızm salasynda ІІM sheteldik qonaqtardyń qaýipsizdigin qamtamasyz etý, týrıstik polıtsııa qyzmetin damytý, onyń tehnıkalyq jabdyqtalýyn jaqsartý jáne áýejaılar men shekara beketterinde QR-kody bar týrıstik kartalar júıesin keńeıtý jumysyn jalǵastyrady. Qorytyndylaı kele, Erjan Sadenov barlyq qyzmetter men aýmaqtyq bólinisterdiń basshylaryna júktelgen mindetterdi dereý oryndaýǵa kirisýdi tapsyrdy.

— Qaýipsiz, quqyqtyq jáne tsıfrlyq Qazaqstan qurý barlyq memlekettik organdardyń úılesimdi áreketin talap etedi. Bul úderiste ІІM negizgi ról atqarady jáne bizdiń mindetimiz — qoǵamǵa naqty nátıje kórsetý, — dep atap ótti mınıstr.

Aıta keteıik, Úkimet Joldaýdy iske asyrý boıynsha eldiń ekonomıka blogyna 10 naqty tapsyrma júktedi.