ІІM: Polıtsııa bir apta ishinde 250 kg esirtki tárkiledi
“Qarasora” arnaıy operatsııasynyń sońǵy aptasynda Túrkistan, Jambyl, Qaraǵandy, Batys Qazaqstan oblystarynda, sondaı-aq Almaty jáne Astana qalalarynda 110 esirtki quqyq buzýshylyǵy anyqtaldy. 125 qylmysker ustaldy. 250 kg esirtki, onyń ishinde 238 kg marıhýana, 2 kg gashısh jáne 10 kg sıntetıka tárkilendi, dep habarlaıdy Kazinform Polisia.kz saıtyna silteme jasap.
Qaraǵandy qalasyna kire beriste Astananyń 35 jastaǵy turǵyny ustaldy, onyń kóliginen 2,7 kg mefedron tárkilendi. Shymkentte jergilikti turǵynnyń kóliginen 3,2 kg mefedron tabyldy.
Almatyda Skoda avtokóliginiń salonyn tintý kezinde 6 kg gashısh tárkilendi. Sonymen qatar Batys Eýropa – Batys Qytaı avtojolynda Ssania júk kóligi toqtatylyp, 4 keliden astam marıhýana anyqtaldy. Kúdiktiniń turǵylyqty jerinde taǵy 136 kg esirtki tabyldy.
Jambyl oblysynyń Shý aýdanynda jergilikti turǵyn ustalyp, odan 67 kg marıhýana tárkilendi.
Ustalǵan adamnyń aıtýynsha, ol baqylaýdyń azaıýyn kútip, esirtkini qysta tasymaldaýdy josparlaǵan.
Demalys kúnderi de bul jumys jalǵasty. Astanada jergilikti turǵynnyń páterin tintý kezinde 1,5 kg mefedron tárkilendi. Al Temirtaýda 22 jastaǵy esirtki jasyrýshy ustaldy. Odan 350 gramm mefedron salynǵan 300 túıinshek tárkilendi.
– Barlyq fakti boıynsha sotqa deıingi is júrgizý bastaldy. Joǵaryda atalǵan qylmystar úshin múlki tárkilenip, on bes jylǵa deıin bas bostandyǵynan aıyrý jazasy kózdeledi. Jyl basynan beri ishki ister organdary barlyǵy 6 217 quqyq buzýshylyqty anyqtady. 32,5 tonna túrli esirtki, onyń ishinde 5,8 tonna marıhýana, 62 kg geroın, 270 kg sıntetıkalyq esirtki tárkilendi. Esirtki bıznesimen aınalysqan 12 uıymdasqan qylmystyq toptyń, onyń ishinde úsh transulttyq toptyń qyzmeti toqtatyldy. Esirtki toptarynyń 14 kóshbasshysy jáne 52 múshesi ustaldy, olardyń ishinde sheteldik azamattar da bar. 40 esirtki zerthanasy joıyldy, – dedi QR ІІM esirtki qylmysyna qarsy is-qımyl departamenti bastyǵynyń orynbasary Sarqytbaı Qusaıynov.
