M. Ótelbaev usynǵan Nave-Stoks teńdeýiniń sheshimi aǵylshyn tiline aýdarylýda
ASTANA. 24 qańtar. QazAqparat - Qazaqstan ǵalymy Muhtarbaı Ótelbaev usynǵan Nave-Stoks teńdeýiniń sheshimin eriktiler aǵylshyn tiline aýdarýda, - dep habarlady New Scientist. Aǵylshyn tiline aýdarý halyqaralyq matematıkalyq qoǵamdastyq ókilderiniń teńdeýdiń sheshýin baǵalaýy úshin qajet.
"Jyldar boıy Nave-Stoks teńdeýin sheshýdiń birneshe nusqalary usynyldy, alaıda olardyń birde-biri durys bolmady", - dedi ǵalymdarǵa problemanyń resmı tujyrymyn jazǵan Prınston ýnıversıtetinen Charlz Fefferman.
"Men orys tilin bilmeımin. Qazaqstandyq ǵalymdar usynǵan teńdeý sheshimi aýdarylmaǵansha, men eshteńe aıta almaımyn", - dedi ol. Qazirgi sátte Massachýsets tehnologııalyq ınstıtýtynyń ǵalymy Mısha Výlfsonnyń jetekshiligimen eriktiler toby Ótelbaev usynǵan Nave-Stoks teńdeýin aǵylshyn tiline aýdarýda.
Mısha Výlfson orys tilin meńgergen, biraq ol dál qazirgi sátte qazaqstandyq ǵalym usynǵan Nave-Stoks teńdeýiniń sheshilý barysyn ǵylymı turǵydan baǵalaı almaıdy. «Men orys tilin jáne matematıkany jaqsy bilgenimmen, atalmysh teńdeýdiń usynylyp otyrǵan sheshimine qatysty ázirge eshteńe aıta almaımyn», - deıdi Výlfson.
Mıssýrıı ýnıversıtetiniń ǵalymy Stıven Montgomerı-Smıt te Muhtarbaı Ótelbaevtyń jumysymen tanysyp, ony aýdarý isine óziniń reseılik áriptesterin tartty. «Oqyp úlgergenderimdi qarasam durys tárizdi. Alaıda, men teńdeý sheshiminiń dálelin kóre alǵanyma senimdi emespin», - deıdi ol.
Eske sala keteıik, Ulttyq ǵylymı akademııasynyń akademıgi Muhtarbaı Ótelbaev «myńjyldyq problemalarynyń» qataryna jatatyn Nave-Stoks teńdeýin sheshken bolatyn. Eýrazııa ulttyq ýnıersıtetiniń professory ony baspaǵa shyǵaryp, jurt nazaryna usynǵan. Bul eseptiń sheshimin tapqanǵa Kleı ınstıtýty bir mıllıon dollar syıaqy jarııalaǵan bolatyn.
