M.Ótelbaev myńjyldyqtyń eń kúrdeli matematıkalyq tapsyrmalarynyń birin sheshti

Oǵan deıin osyndaı jetistikke Pýankare gıpotezasyn dáleldegen Grıgorıı Perelman ǵana qol jetkizgen bolatyn , dep habarlady astana.kz saıty L.N.Gýmılev atyndaǵy Eýrazııa ulttyq ýnıversıtetiniń baspasóz qyzmetine silteme jasap.

Professor, QR UǴA fızıka-matematıka ǵylymdarynyń doktory, L.N. Gýmılev atyndaǵy EUÝ-dyń Eýrazııalyq matematıka ınstıtýtynyń dırektory Muhtarbaı Ótelbaev «Nove-Stoks teńdeýleriniń myqty sheshiminiń bolýy» atty eńbegin aıaqtap, ashyq basylymda jarııalady.

Bul eńbektiń mańyzdylyǵy - atalmysh problema «myńjyldyqtyń problemasy» dep atalatyn 7 eń kúrdeli matematıkalyq esepterdiń qataryna engen. Aıta keteıik, osy problemalardyń árqaısysyn sheshýde Kleı matematıkalyq ınstıtýty 2000 jyldyń basynda 1 mıllıon AQSh dollaryn báıgege tikken bolatyn. Qazirgi ýaqytta myńjyldyqtyń jeti problemasynyń tek bireýi ǵana (gıpoteza Pýankare) sheshimin tapqan. Onyń ıesi - Grıgorıı Perelman, ol Fıldsovskıı syılyǵyna ıe bolǵan.

Baspasóz qyzmetiniń habarlaýynsha, Muhtarbaı Ótelbaevtyń ǵylymı qyzyǵýshylyq salasyna fýnktsıonaldyq analız jáne onyń qoldanystary, dıfferentsıaldyq operatorlardyń spektrlik teorııasy, fýnktsıonaldyq keńistik teorııasy, esepteý matematıkasy, shekaralyq esepterdiń jalpy teorııasy kiredi.

Muhtarbaı Ótelbaev - 2002 j.; 2002-2003 jj. men 2004-2005 jj. «Altyn adam» baıqaýynda («Ǵylym» nomınatsııasy boıynsha «Jyl adamy») «Jyldyń ǵylymı qaıratkeri» ataǵynyń ıegeri, ǵylym men tehnıkanyń damýyna eleýli úles qosqan ǵalymdar men mamandarǵa arnalǵan memlekettik ǵylymı stıpendııasynyń ıegeri, «Ǵylym men tehnologııalar» nomınatsııasy boıynsha Ekonomıkalyq yntymaqtastyqty uıymy syılyǵynyń laýreaty, 2004 j. «JOO-nyń eń úzdik oqytýshysy» QR BǴM grantynyń ıegeri, ǵylym men tehnıka salasyndaǵy Qazaqstan Respýblıkasynyń memlekettik syılyǵynyń laýreaty.