ІІM otbasylyq zorlyq-zombylyqtyń aldyn alý sharalaryn kúsheıtti

ASTANA. KAZINFORM – 15–22 aqpan aralyǵynda respýblıka aýmaǵynda «Turmys» atty jedel-profılaktıkalyq is-sharasy júrgizilip jatyr, dep habarlaıdy Polisia.kz.

Áıelderdiń quqyqtaryn qorǵaý, balalardyń qaýipsizdigin qamtamasyz etý jáne otbasylyq qundylyqtardy saqtaý Memleket basshysy men Іshki ister mınıstrligi basshylyǵynyń erekshe baqylaýynda.

Otbasylyq-turmystyq qatynastar salasynda, onyń ishinde alkogoldik masań kúıde jasalatyn quqyq buzýshylyqtardyń aldyn alý maqsatynda uıymdastyrylǵan is-shara aıasynda polıtsııa qyzmetkerleri turmysta quqyq buzýshylyq jasaýǵa beıim adamdardy turǵylyqty jeri boıynsha tekseredi. Sonymen qatar qolaısyz otbasylarmen profılaktıkalyq jumystar júrgizip, quqyqtyq yqpal etý sharalaryn qabyldaıdy.

Sondaı-aq quqyq buzýshylyqqa yqpal etetin sebepter men jaǵdaılardy anyqtaý, zardap shekkenderdi qorǵaý jáne qoldaý sharalary qarastyrylǵan. Úkimettik emes uıymdarmen jáne daǵdarys ortalyqtarymen birlesip turmystyq zorlyq-zombylyq qurbandaryna quqyqtyq ári konsýltatsııalyq kómek kórsetiledi.

«Qurmetti azamattar! Biz sizderdi zorlyq-zombylyq faktilerine beı-jaı qaramaýǵa shaqyramyz. Eger kórshilerińiz, tanystaryńyz nemese týystaryńyz arasynda, ne kóshede zańsyz áreketterge kýá bolsańyz, beıjaı qaldyrmańyz. Keıde bir ǵana ýaqytyly qońyraý shalý nemese qarapaıym áreket bireýdiń ómirin saqtap, bir balany úreıden qorǵaı alady. Biz zorlyq-zombylyqqa tózbeýshilik tanytý arqyly ǵana qaýipsiz ári ádil qoǵam qura alamyz», – dedi ІІM Ákimshilik polıtsııa komıteti basqarmasynyń bastyǵy Aqmaral Serikbaeva.

Aıta keteıik, Qazaqstanda zorlyq-zombylyqqa ushyraǵan balalarǵa kómek kórsetý kabınetteri ashylady.