ІІM Óskemendegi jarylys týrasynda: kúdiktiler áli anyqtalmady
ASTANA. KAZINFORM – Іshki ister mınıstriniń orynbasary Sanjar Ádilov Óskemendegi «Qaztsınk» kásipornyndaǵy jarylysqa qatysty bastalǵan tergeý amaldaryna túsinik berdi.
- Qazir «Qaztsınkke» qatysty tergeý júrip jatyr. Jedel-tergeý toby quryldy. Qylmystyq kodekstiń 156-babynyń 4-bóligi boıynsha tergep jatyrmyz. Bul bapta jeti jylǵa deıin bas bostandyǵynan aıyrý jazasy qarastyrylǵan. Jedel-tergeý toby tájirıbeli qyzmetkerlermen tolyqtyryldy. Búginde 10-nan astam sot-medıtsınalyq saraptamany belgiledik. Olardyń eń mańyzdysy - jarylys sebebin anyqtaý, - dedi S. Ádilov Parlament Májilisinde tilshiler suraǵyna jaýap bere otyryp.
Bul rette eki negizgi nusqa tekseriledi: tehnogendik protsestiń buzylýy sebebi men adamı faktor jáne eńbek qaýipsizdigi erejeleriniń buzylýy.
- Qazir bul máselemen ýákiletti memlekettik organdardyń, Ónerkásip mınıstrligi men oblys ákimdiginiń mamandary aınalysyp jatyr. Komıssııanyń sheshimi men keshendi sot-medıtsınalyq saraptama kinálilerdi qylmystyq jaýapqa tartý maqsatynda tergeýge baǵyt-baǵdar beredi, - dedi mınıstrdiń orynbasary.
Onyń aıtýynsha, zardap shekken eki adam aýrýhanada jatyr, onyń biriniń jaǵdaıy aýyr.
- Áli de naqty kúdiktiler anyqtalmady. Tergeý endi ǵana bastalyp jatyr. Sot saraptamasynyń qorytyndysyn kúteıik, - dedi Sanjar Ádilov.
Eske salsaq, 5 mamyrda tańerteń Óskemendegi kásiporynda jarylys boldy.
Sonyń saldarynan eki adam qaza bolyp, beseýi zardap shekti.
Jarylysqa qatysty polıtsııa qylmystyq is qozǵady.
