ІІM onlaın-alaıaqtyqtyń jańa tásili týraly málimdeme jasady
ASTANA. KAZINFORM — Іshki ister mınıstrligi jasandy ıntellekttiń zamanaýı tehnologııalaryn qoldanýmen baılanysty ınternet-alaıaqtyqtyń jańa túri anyqtalǵanyn málimdedi
Áleýmettik jelilerde deepfake arqyly bankterdiń biriniń basshysynyń beınesi qoldanylǵan beınerolık taralyp jatyr.
Bul rolıkte azamattarǵa Halyk+ dep atalatyn ınvestıtsııalyq platformanyń kómegimen iri kólemde aqsha tabýǵa bolady degen jalǵan aqparat aıtylady.
Іshki ister mınıstrligi mundaı platformanyń joq ekenin málimdeıdi. Taralyp jatqan aqparat jalǵan jáne azamattardy adastyrýǵa baǵyttalǵan. Bul aqshalaı shyǵynǵa ákelýi múmkin.
Azamattar kez kelgen belgisiz onlaın-platformalar arqyly aqsha salý týraly usynystardyń alaıaqtyq táýekeli joǵary ekenin esten shyǵarmaýy tıis. Qaýipsizdik maqsatynda qarjylyq operatsııalardy tek bankterdiń resmı bólimshelerine jeke baryp júrgizý qajet.
Іshki ister mınıstrligi azamattardy: áleýmettik jelilerdegi kúmándi beınerolıkter men jarııalanymdarǵa senbeýge; belgisiz siltemelerge ótpeýge; jeke derekterdi úshinshi tulǵalarǵa bermeýge; aqparatty tek resmı derekkózder arqyly tekserýge shaqyrady.
Aıta ketelik jasandy ıntellektiniń deepfake tehnologııasy alaıaqtardyń jańa quralyna aınaldy. Bul tásil arqyly kez kelgen adamnyń túri men daýysyn shynaıy beıneleıtin vıdeo jasaýǵa bolady.
