ІІM oqýshylar men stýdentterdi esirtki qylmysynan saq bolýǵa shaqyrdy
ASTANA. KAZINFORM – ІІM jazǵy demalys qarsańynda oqýshylar men stýdentterge úndeý jasap, kúmándi jumys usynystarynan saq bolýǵa shaqyrdy, dep habarlaıdy Polisia.kz.
Vedomstvo málimetinshe, kanıkýl kezinde ınternet pen áleýmettik jelilerde «jeńil ári tez tabys» usynatyn habarlandyrýlar kóbeıedi.
Alaıda olardyń artynda esirtki tasymaldaý, taratý, nasıhattaý jáne jarnamalaý sııaqty zańsyz áreketter jasyrynýy múmkin.
– Bul jaı ǵana qaýip emes, bul – qylmys. Esirtkige qatysty qylmystar úshin qylmystyq jaýapkershilik 16 jastan bastalady. Eń qatań jaza ómir boıyna bas bostandyǵynan aıyrýǵa deıin qarastyrylǵan, – dedi ІІM Esirtki qylmysyna qarsy is-qımyl komıteti tóraǵasynyń orynbasary Qýandyq Áljanov.
Onyń aıtýynsha, bir ǵana «jeńil tabys» búkil ómirge keri áser etýi múmkin.
ІІM jastardy kúmándi jumys usynystarynan birden bas tartýǵa shaqyrdy.
– Jyldam tabys ıllıýzııasy úshin óz bolashaǵyńyzdy qaterge tikpeńiz. Erkindik aqshadan qymbat, al bolashaq ýaqytsha paıdadan mańyzdy, – dedi Qýandyq Áljanov.
Aıta keteıik, Almatyda 20 jastaǵy kýrerden 2,5 keli esirtki tárkilendi.
