ІІM oqý oryndaryna túsý úshin UBT-dan 50 ball jetkilikti me
ASTANA. KAZINFORM — ІІM vedomstvolyq oqý oryndaryna talapkerlerdi qabyldaý tártibine qatysty túsinikteme berdi.
Mınıstrliktiń málimetinshe, UBT-dan 50 ball jınaý — ІІM-niń joǵary oqý oryndaryna konkýrsqa qatysýǵa múmkindik beretin eń tómengi shek. Alaıda bul kórsetkish talapkerdiń avtomatty túrde oqýǵa qabyldanatynyn bildirmeıdi.
— Sebebi ІІM oqý oryndaryna qabyldaý konkýrs negizinde júrgiziledi. Bul rette talapkerlerdiń UBT nátıjelerimen qatar medıtsınalyq, fızıologııalyq jáne psıhofızıologııalyq irikteý nátıjeleri de eskeriledi. Odan ári úmitker belgilengen irikteý kezeńderinen ótip, konkýrs nátıjesi boıynsha jetkilikti kórsetkish kórsetýi qajet. Sondyqtan ІІM oqý ornyna túsýge nıetti talapker úshin maqsat tek 50 ball jınaý emes, UBT-dan múmkindiginshe joǵary nátıje kórsetý jáne belgilengen irikteý talaptaryna saı bolý, — delingen vedomstvo taratqan aqparatta.
Osyǵan deıin Іshki ister mınıstrligi vedomstvolyq oqý oryndaryna qabyldaý týraly jalǵan SMS-habarlamalardan saqtandyrdy.
