ІІM metall synyqtaryn kontrabandalyq jolmen tasymaldaý shemalaryn anyqtady
ASTANA. KAZINFORM – Іshki ister mınıstrligi qara metaldy jaqyn jáne alys shet elderge kontrabandalyq jolmen áketýdiń qylmystyq shemalaryn anyqtaý jáne jolyn kesý boıynsha jedel sharalar qabyldady. Bul týraly Polisia.kz habarlady.

— Tyıymǵa qaramastan, elimizdiń birqatar óńirinde metall synyqtaryn daıyn ónim men shıkizat túrinde kórsetip, teńiz jáne temir joldary arqyly zańsyz eksportty uıymdastyrǵan adamdar anyqtaldy. Máselen, Soltústik Qazaqstan oblysy polıtsııa departamenti uıymdasqan qylmysqa qarsy kúres basqarmasynyń qyzmetkerleri «joǵary legırlengen bolat» degen atpen kórshiles memleketke temirjol arqyly qara metaldy jóneltýdi uıymdastyrǵan JShS-lerdiń biriniń basshysynyń zańsyz áreketin toqtatty. Tyıymdy elemegen kompanııa elden bir jarym myń tonnadan astam, jalpy quny 170 mln teńgeden asatyn metall synyqtaryn áketken. Іzdeý is-sharalary barysynda metall bazasynyń aýmaǵynda salmaǵy myń tonnaǵa jýyq qara metaldyń synyqtary, onyń ishinde shetelge jóneltýge daıyndalǵan jeti vagon tabyldy, — dedi ІІM uıymdasqan qylmysqa qarsy kúres departamentiniń ókili Qýandyq Alpys.
Osyǵan uqsas shema Mańǵystaý oblysynda joıyldy. Onda kompanııalardyń biri Kaspıı mańy elderine teńiz arqyly qara metall jóneltýmen aınalysqan. Ótken jyldyń ózinde bul kompanııa 400 tonnadan astam metaldy elden áketken. Jedel-tergeý is-sharalary barysynda JShS aýmaǵynda salmaǵy 420 tonnadan asatyn qara metaldyń synyqtary, onyń ishinde kórshi memleketke jóneltýge daıyndalǵan eki konteıner tabyldy.
— Qazirgi ýaqytta ІІM UQK-men, Qarjy monıtorıngi agenttigimen jáne Bas prokýratýramen birlesip, qara jáne tústi metall kontrabandasyna jol bermeý, sondaı-aq aldyn alý boıynsha is-sharalar keshenin júzege asyrýda. Bul baǵyttaǵy jumys jalǵasýda, — dedi Qýandyq Alpys.
Aıta ketelik Túrkistan oblysynda ekstremıstik materıaldardy taratqan top ustalǵan edi.