ІІM men UQK iri onlaın-kazıno jelisin anyqtady
Jalpy el boıynsha 326 loto klýb qyzmetine tosqaýyl qoıyldy, – dep habarlaıdy Polisia.kz.
Sońǵy jyldary elimizde lýdomanııa beleń alýda. Bul – qumar oıyndarǵa patologııalyq táýeldilik.
Azartqa berilýdiń sońy áleýmettik-materıaldyq qundylyqtardyń tómendeýine, tipti keıde qylmys jasaýǵa túrtki bolýy múmkin.
Resmı derekterge sáıkes, Qazaqstanda shamamen qumar oıyndaryna salynǵan 350 myń adam bar. Olardyń árbiriniń ortasha qaryzy shamamen 10 mln teńgeni quraıdy.
Aqsha tigip, toqtaı almaýdyń saldary elde erli-zaıyptylardyń ajyrasýyna, qumar oıynǵa qunyqqandardyń ózine-ózi qol jumsaýyna ákep soǵýda. Sondyqtan bul másele búginde ózekti jáne memleket nazarynda.
13 qańtarda Іshki ister mınıstrligi Ulttyq qaýipsizdik komıtetimen birlesip, Bas prokýratýranyń úılestirýimen lotereıa klýbtarynyń atymen jumys isteıtin zańsyz onlaın-kazınolardyń iri jelisin joıdy.
Eń aýqymdy birlesken arnaıy operatsııany júrgizýge Іshki ister mınıstrligi men Ulttyq qaýipsizdik komıtetiniń úsh myńnan astam qyzmetkeri jumyldyryldy.
— Jedel ázirleme orbıtasynda krımınalıtet ókilderi de boldy, olar oıyn mekemelerine qylmystyq yqpal jáne qamqorlyq etken, sondaı-aq loto klýb qyzmetkerleri men klıentterine qatysty qylmystar jasaǵan. Zańsyz oıyn qyzmetinen basqa, VIP-klıentterge ıntımdik qyzmetterdi uıymdastyrý, jeńgetaılyq jáne esirtki zattaryn paıdalaný faktileri tirkeldi. Arnaıy operatsııa barysynda polıtsııaǵa 400-den astam adam jetkizildi. Negizgi qylmystyq shemany uıymdastyrǵan segiz adam, onyń ishinde alys jáne jaqyn shetel azamattary ustaldy, – dedi QR ІІM Uıymdasqan qylmysqa qarsy kúres departamentiniń basqarma bastyǵy Qýandyq Alpys.
Respýblıka boıynsha loto klýbtarǵa 570 tintý júrgizildi. 23 birlik atys jáne travmatıkalyq qarý, 247 mln teńge, 55 mln Reseı rýbli, 125 myń AQSh dollary, kompıýterlik tehnıka, mobıldi qurylǵylar, sondaı-aq basqa da zattaı dáleldemeler tárkilendi. Nátıjesinde elde barlyǵy 326 loto klýb qyzmetiniń joly kesildi.
Shetelden onlaın-kazıno taratatyn serverler anyqtalyp, buǵattaldy. Ákimshilerdiń oıyn barysyna yqpal etip, rettep otyrǵany belgili boldy. Buryn júrgizilgen saraptamalar ustalǵan adamdardyń zańsyz áreketterin rastady.
– Sotqa deıingi tergep-tekserý barysynda bir ǵana óńirdiń loto klýbtarynyń aı saıynǵy jıyntyq tabysy orta eseppen 300 mln teńgeni quraıtyny anyqtaldy, sáıkesinshe elimizdiń barlyq óńirlerinen shamamen 6 mlrd teńgeni quraǵan. Bul rette aqsha qarajatynyń shamamen 70% shetelge shyǵarylǵan. Uıymdastyrýshylardyń bireýiniń ǵana banktik shotyna aı saıyn shamamen 900 mln teńge túsip otyrǵan. Tergeýdi ІІM tergeý departamenti Qylmystyq kodekstiń birneshe baptary boıynsha júrgizýde, fıgýranttarǵa uıymdasqan qylmystyq top qurý, oǵan basshylyq etý jáne qatysý aıyby taǵylýda. Basqa málimetter jarııalaýǵa jatpaıdy, – dedi Qýandyq Alpys.
