ІІM men Oqý aǵartý mınıstrligi LGBT nasıhatyna qarsy petıtsııany qoldap otyr

ASTANA. KAZINFORM – Mádenıet jáne aqparat mınıstrligi LGBT nasıhatyna qarsy petıtsııa boıynsha qoǵamdyq talqylaý uıymdastyrdy. Kezdesýge BAQ ókilderi men qoǵam belsendileri qatysty.

Oqý-aǵartý mınıstrliginiń atynan kelgen Balalardyń quqyqtaryn qorǵaý komıtetiniń tóraǵasy Nasymjan Ospanova LGBT nasıhatyna qarsy zań jobasyn qoldaıtynyn aıtty. Komıtettiń UNICEF-pen birlesip júrgizgen saýalnamasyna qatysqan balalardyń 11%-y jeke tanymaıtyn adamdarǵa óz sýretterin jibergenin moıyndaǵan. 19 balaǵa sýretin surap, aqsha usynǵan. Al 15 balany ekrannyń ar jaǵyndaǵy «dosy» kezdesýge shaqyrǵan. 83 bala jynystyq sıpattaǵy habarlama alǵanyn málim etken kórinedi.

Іshki ister mınıstrliginiń atynan sóz alǵan Azamattyq polıtsııa komıteti tóraǵasynyń orynbasary Renat Zulhaıyrov ta LGBT-ǵa qarsy zań qabyldaý usynysyn qoldaıtynyn aıtty. Balalarǵa jynystyq kúsh kórsetý faktilerinde kámeletke tolmaǵandardyń úlesi barshylyq ekenin naqty mysaldarmen baıandaǵan ІІM ókili mundaı bassyzdyqtardyń artynda LGGBT nasıhaty jatýy da múmkin ekenin aıtty.