M. Melanıdiń "Vokal týraly qysqasha sóıleseıik" kitabynyń tanystyrylyldy
ALMATY. 17 aqpan. QazAqparat /Erlik Erjanuly/ - Búgin Almatyda Marıo Melanıdiń orys tiline aýdarylǵan "Vokal týraly qysqasha sóıleseıik" dep atalatyn kitabynyń tanystyrylymy boldy.
"Marıo Melanıdyń bul kitabyn oqyp, tanysyp shyqtym. Ol konservatorııany bitirip jańa jumys bastap jatqan jas ánshilerge jáne ustazdyq qyzmetpen jańadan shuǵyldana bastaǵan oqytýshylar úshin óte úlken dúnıe. Keńes Odaǵy kezinde mundaı eńbekter kóp jazylǵan bolatyn. Biraq onyń ishinde fılosofııa men medıtsınalyq termınologııa óte kóp boldy. Sondyqtan jastarǵa onyń bári birdeı túsinikti bola bermedi. Al bul kitap qarapaıym tilmen bárin uǵynyqty túrde jetkizedi", - deıdi KSRO Halyq artısi Bıbigúl Tólegenova.
Onyń sózine qaraǵanda, qazirgi tańda qazaq tilinde ánshilerge arnalǵan oqýlyqtar óte az. Oǵan eń aldymen termın sózderdiń kóptigi kedergi bolýda. Sol sebepti qazaq tilindegi mundaı oqýlyqtar bolashaqtyń enshisine qalyp otyr.
Jalpy, Marıo Melanıdiń "Vokal týraly qysqasha sóıleseıik" kitaby QR Tuńǵysh Prezıdenti qorynyń qarjylaı qoldaýymen jaryq kórip otyr. Ol 2010 jylǵy "Intellektýaldy jasampaz qoǵam: bilim jáne jańa tehnologııalar" taqyrybynda ótken áleýmettik ıdeıalar men jobalar jármeńkesi aıasynda júzege asyryldy.
