M. Maqataevtyń qanatty poezııasy qazaq halqynyń sezimin baıytyp, parasatyn kemeldendire tústi - Q. Túmenbaı
ALMATY. 4 aqpan. QazAqparat /Názıra Eleýhan/ - Búgin Almatyda Respýblıkalyq Kitap murajaıy men T.Júrgenov atyndaǵy Qazaq Ulttyq óner akademııasynyń uıymdastyrýymen Muqaǵalı Maqataevtyń týǵanyna 80 jyl tolýyna oraı «Ánniń gaýhary, jyrdyń jaýhary - Muqaǵalı» atty sazdy kesh ótti.
Keshte Nurǵalı Núsipjanov, Dálel Ýashev, Shaıahmet Imashev jáne taǵy da basqa óner qaıratkerlerimen qatar akademııa stýdentteri óner kórsetti. Aqıyq aqynnyń óleńderi oqylyp, óleńderine jazylǵan ánder shyrqaldy. Aqynmen jaqyn bolǵan, kózkórgen aqsaqaldar Muqaǵalıdi eske aldy.
Jazýshy Qýandyq Túmenbaıdyń aıtýynsha, Muqańnyń ólmes óneri, qanatty poezııasy qazaq halqynyń sezimin baıytyp, kisiligin bıiktetip, parasatyn kemeldendire túsken. «Muqaǵalıdiń poezııasy - tunǵan muń. Ol ómirinde qıyndyqty kóp kórdi. Shyǵarmashylyǵyn kózi tirisinde kórsete almady, ózin halyqqa tanyta almady. Sóıtip ómirden muńmen ketti. Onyń 80 jyldyǵy atalyp jatyr, basylymdar jazyp jatyr, toı bolady... Biraq qazirgi ýaqytta Muqaǵalıdiń janynyń náziktigin kórsetý jetpeı jatyr. Ol týraly kitaptar da, estelikter de bar, endi kózkórgenderdi sóıletip habarlar men derekti fılmder túsirilse»,-deıdi qalamger.
Onyń aıtýynsha, «Muqaǵalı» jýrnalynyń taralymy búginde 9 myńǵa jetken. «Bul Qazaq ádebıetinen de, Juldyz jýrnalynan da asyp ketti degen sóz. Ol halyqtyń Muqaǵalıǵa degen yqylasy sónbeıdi, ólmeıdi degen sóz»,- dep atap ótti Qýandyq Túmenbaı.
