M.Maqataev atyndaǵy «Poezııa, menimen egiz be ediń?!» jas aqyndar baıqaýy jarııalandy
Shara aqıyq aqyn Muqaǵalı Maqataevtyń murasyn nasıhattaý, uly aqynnyń shyǵarmalary arqyly óskeleń urpaqty otansúıgishtikke tárbıeleý, jas talanttardy, aqyndardy taný, óleń qudireti arqyly memlekettik tildiń mártebesin kóterý maqsatynda uıymdastyrylyp otyr. Baıqaý eki kezeńnen turady. Baıqaýdyń irikteý kezeńi ústimizdegi jyldyń 17 aqpanynda ótedi. Respýblıkalyq baıqaý shilde aıynda ótkiziledi, onyń naqty ýaqyty, ótetin jeri qosymsha habarlanady. Baıqaýǵa 20-30 jas aralyǵyndaǵy jastar qatysa alady. Baıqaý úsh tapsyrma boıynsha ótkiziledi. «Poezııa, menimen egiz be ediń?!» tapsyrmasynda qatysýshynyń M.Maqataevqa arnaǵan óleńi oqylýy tıis. Bul aqynnyń poezııada alatyn ornyn, sýretkerlik beınesin, qalamgerlik sheberligin tanyta alarlyq shyǵarma bolýy shart. «Al ekinshi baqytym - tilim meniń» kezeńinde qatysýshynyń til taqyrybyna arnalǵan óleńi oqylady. Shyǵarmada ana tilimizdiń baǵa jetpes baılyǵy, sonymen birge babalardan qalǵan asyl qazynamyz jáne memlekettiń basty tili ekendigi kórinis tabýy tıis. «Bolashaǵym, sen tursań men ólmespin!» tapsyrmasynda «Kúndelik jaz, jarqynym!» taqyrybynda aqynnyń kúndeliginen syr shertý, oı tolǵaý nemese «Esińe meni alǵaısyń» taqyrybynda aqynnyń óleńine jazylǵan ándi oryndaýy qajet. Baıqaýǵa qatysýshy úmitker óleńderin (qaǵaz túrinde jáne elektrondy nusqasymen) 2015 jyldyń 13 aqpanyna deıin Astana qalasynyń Tilderdi damytý basqarmasyna tapsyrýy tıis. Oqylatyn shyǵarmalar kólemi 2-3 mınýttan aspaýy kerek. Qatysýshylardyń óleńderin qazylar alqasy saraptaıdy, talapqa saı emes óleńder baıqaýǵa jiberilmeıdi. Baıqaý jeńimpazdary baǵaly syılyqtarmen, dıplomdarmen marapattalady. І oryn ıegerine respýblıkalyq baıqaýǵa joldama beriledi, dep habarlaıdy adebiportal.kz.