M.Lomonosov atyndaǵy Máskeý memlekettik ýnıversıtetiniń qazaqstandyq fılıalynyń túlekterine dıplomdar tapsyryldy
ASTANA. Shildeniń 9-y. QazAqparat /Marlan Jıembaı/ - Búgin elordadaǵy QR Prezıdenttik mádenıet ortalyǵynda M.Lomonosov atyndaǵy Máskeý memlekettik ýnıversıtetiniń qazaqstandyq fılıalynyń túlekterine saltanatty jaǵdaıda dıplomdary tabys etildi.
Saltanatty shara barysynda sóz alǵan atalǵan bilim oshaǵynyń dırektory Aleksandr Sıdorovıch fılıaldyń Qazaqstan Prezıdenti Nursultan Nazarbaevtyń tikeleı bastamasymen qurylǵandyǵyn, sonymen qatar, 5-shi márte mamandarǵa sát sapar tilegen bilim oshaǵynyń oqý jylynyń aıaqtalýy Memleket basshysynyń 70 jyldyq mereıjasymen sáıkes kelip otyrǵandyǵyn atap ótti.
«Máskeý memlekettik ýnıversıtetiniń qazaqstandyq fılıaly - bul TMD elderiniń ishinde Memleket basshysynyń bastamasy boıynsha qurylǵan alǵashqy fılıal. Bul oqý orny QR granttarynyń esebinen tolyǵymen qarjylandyratyn, óz stýdentterin el ishinde, sonymen qatar Máskeýde de oqytatyn birinshi fılıal bolyp tabylady», -dedi A. Sıdorovıch.
Bıylǵy jyly oqý ornyn bitirgen túlekterdiń 20 paıyzy úzdik dıplomdy ıelenip otyr.
«Biz Qazaqstandaǵy fılıaldy maqtan tutamyz jáne biz Nursultan Nazarbaevqa onyń senimin aqtap otyrǵanymyzdy batyl túrde aıta alamyz», - dedi fılıal dırektory.
Aıta keteıik, MMÝ qazaqstandyq fılıaly 2001 jyly quryldy jáne alǵashqy kezde 97 stýdent qabyldanǵan edi. Qazirgi kezde olardyń sany 600-ǵa jetti.
A. Sıdorovıchtiń sózine qaraǵanda, olardyń barlyǵy matematıka salasynda, júıelik baǵdarlamalyq qamtamasyz etýde, fılologııada, jáne basqa da ǵylymdarda irgeli bilimderdi ıgergen. Barlyq stýdentter joǵary kýrstarda Máskeýde bilim alǵan, sondaı-aq MMÝ memlekettik komıssııasynyń aldynda dıplomdyq jumystaryn qorǵady.
Túlekterdi quttyqtaýǵa MMÝ-diń professorlyq-oqytýshylyq quramy, ótken jyldardaǵy túlekter keldi. Dıplomdardy tapsyrý rásimi merekelik kontsertke ulasty.
