Məlik Myrzalın jeńilisten kóz ashpaıtyn FK jankúıerlerimen kezdesti

Kezdesýde klýb aldynda turǵan basty mindet bıyl qaıtkende de premer-lıgadan shyǵyp qalmaý máselesi qaraldy.

Premer-lıgada eń sońǵy orynda turǵan «Oqjetpes» fýtbol klýbynyń basynan sońǵy oıyndarda bult arylmaı-aq qoıdy. Komandadaǵy aıaq dop sheberleriniń oıynyna jankúıerlerdiń qaryny ashady. Ol jaıynda buqaralyq aqparat quraldarynda talaı márte aıtylyp ta, jazylyp ta júr. Alda áli bes oıyn bar. Bul kezdesýlerden upaı jınaý komandanyń birinshi lıgaǵa túsip qalmaýy úshin aýadaı qajet.

 

«Oqjetpes» fýtbol klýbynyń jankúıerleri súıikti komandasynyń aldaǵy oıyndarynda jaqsy nátıjege qol jetkizip, elimizdegi kileń myqty komandalar oınaıtyn joǵarǵy topta qalatynyna senim artyp otyr. Jergilikti komandanyń sońǵy kezdesýlerde jeńiske jetýi kelesi jyly premer-lıgada oınaýyna jol ashady degen úmit otyn oıatady.

«Men birinshi kezekte komanda jankúıerlerine alǵys bildiremin. Ekinshiden komanda maýsym barysynda bizdiń úmitimizdi aqtaı almady. Sondyqtan, klýb basshylyǵymen qosh aıtysýǵa týra keldi. Udaıy osylaı bola berý múmkin emes. Sol sebepti biz óńirde fýtboldyń damýyna jol ashatyn ishki reformalardy qolǵa alatyn bolamyz», deı kele aımaq basshysy komandanyń tómen kórsetkishke jetýiniń sebepterin atady.

 

«Komandaǵa qajetti materıaldyq-tehnıkalyq baza, ınfraqurylym bári bar. Biraq nátıje joq. Bul árıne, klýbtyń tıimsiz menedjmenti men selektsııalyq jumystardyń álsizdiginen bolyp otyrǵanyna kóz jetkize alamyz», dedi aımaq basshysy. 

Sonymen qatar, kezdesýde komanda oıynshylarynyń qalǵan kezdesýlerde jigerlik tanytyp, qaıtken kúnde de jeńis jetýleri sóz boldy.

«Bizdiń premer lıgada qalýymyzǵa múmkindigimiz bar. Sondyqtan fýtbolshylar baryn salýy qajet. Sońǵy oryn «Oqjetpeske» laıyq emes, 2016 jylǵy maýsymda komanda 5-shi orynnan kórindi. Komandanyń jankúıerler aldyndaǵy basty mindeti - senimdi joǵaltpaý. Sol sebepti jankúıerleri de súıikti komandasyna qoldaý bildiredi dep senemin», - dedi aımaq basshysy.

Kezdesý barysynda komandaǵa legıonerlerden góri, jergilikti oıynshylardy tartý, materıaldyq-tehnıkalyq bazany odan əri nyǵaıtý, talantty jastardy tárbıeleý týraly jankúıerlerdiń saýaldaryna da qulaq túrildi.

  

Eske sala keteıik, «Oqjetpes» klýby qazannyń 15-i kúni kúrdeli jóndeý jumystary júrgizilgen óz alańynda «Taraz» komandasyn qabyldaıtyn bolady. Qazirgi kezde oqjetpestikter 28 oıynda 21 upaı jınap, týrnır kestesiniń sońǵy 12-shi ornynda tur.

Aslan Ospanov.