M.Qul-Muhammed: Slesar, santehnık, elektrıkter teatr ártisinen de kóp jalaqy alady

ASTANA. QazAqparat - Óńirlerde teatr ártisteriniń jalaqysyn 1,7 nemese 2 kóterme koeffıtsıentterin paıdalaný arqyly jergilikti bıýdjet esebinen ósirý qajet. Bul týraly búgin QR Úkimetiniń selektorlyq rejimdegi otyrysynda QR Mádenıet jáne aqparat mınıstri Muhtar Qul-Muhammed aıtty.

Otandyq teatrlardaǵy kúrdeli problemalardyń biri jalaqy máselesi bolyp otyrǵandyǵyn basa aıtqan mınıstr: «Bul problema respýblıkalyq deńgeıde birtindep sheshilip keledi. Oblystyq teatrdyń ártisteri negizinen 30-40 myń teńge ǵana jalaqy alady. Al keıbir teatrlardaǵy slesar, santehnık, elektrık sııaqty jumysshylar ártisterden áldeqaıda kóp jalaqy alyp otyr», - dedi ol.

Sondyqtan mınıstr óńir ákimderinen oblystyq teatr áristeriniń, teatr ǵana emes, jalpy mádenıet salasy qyzmetkerleriniń jalaqysyn muqııat qarap shyǵyp, olardy 1,7 nemese 2 kóterme koeffıtsıentterin paıdalaný arqyly jalaqyny jergilikti bıýdjet esebinen ósirýdi suraıtyndyǵyn basa aıtty.

«Úlkendi-kishili merekelerde, saıası sharalarda el aldyna shyǵyp sóıleıtin osy zııaly qaýym ókilderi emes pe? Endeshe, mádenıet maıtalmandarynyń jalaqysy olardyń halyq aldyndaǵy bedeline saı bolǵany jón dep bilemin», - dedi M.Qul-Muhammed.