M. Qul-Muhammed: Ótken jyly qurylys jáne TKSh salasynda 200-ge jýyq qylmys anyqtaldy
Bul týraly búgin Aqordada QR Prezıdenti janyndaǵy Sybaılas jemqorlyqqa qarsy kúres máseleleri jónindegi komıssııanyń otyrysy barysynda QR Memlekettik hatshysy Muhtar Qul-Muhammed málim etti.
«Qarjylandyrý aýqymy boıynsha turǵyn úı qurylysy sharýashylyǵy men qurylys salasy aıtarlyqtaı shyǵyndy bolyp tabylady. Jyl saıyn osy salalarǵa aıtarlyqtaı qomaqty bıýdjet qarajaty da bólinip jatyr. Máselen, 2011 jyldyń ózinde qurylys jumystarynyń kólemi 2 trln. 82 mlrd. teńgeni quraǵan. Úlestik qurylysty qoldaý úshin 2007 jyldan kúni búginge deıin 461 mlrd. teńge jumsaldy», - dedi M. Qul-Muhammed.
Sóz arasynda Memlekettik hatshy memlekettik baǵdarlamalardy oryndaý barysynda zań buzýshylyqtarǵa jıi jol berilip jatanyn da atap ótti. Máselen, tek 2011 jyldyń ózinde ǵana qarjy polıtsııasy organdary qurylys jáne turǵyn úı-kommýnaldyq sharýashylyq salasynda 200-ge tarta qylmysty anyqtaǵan.
«Onyń ózinde de zań buzýshylyqtar áleýmettik mańyzǵa ıe nysandardyń qurylysy barysynda da, olardy jańǵyrtý men kúrdeli jóndeý barysynda da oryn alyp otyr. Qurylyspen baılanysty jekelegen ınvestıtsııalyq jobalardy júzege asyrý nysannyń alǵashqy kezeńdegi qunynan birneshe dúrkin qymbattatý arqyly júzege asady. Bunyń ózi osy salada sybaılas jemqorlyq sıpatyndaǵy júıeli problemalardyń bar ekendigin bildiredi», - dedi M. Qul-Muhammed.
