M. Qul- Muhammed Astanalyq jáne Qazaqstandyq Mıtropolıt Aleksandrmen kezdesti
ASTANA. Qyrkúıektiń 2-si. QazAqparat -QMádenıet mınıstri Muhtar Qul-Muhammed Astanalyq jáne Qazaqstandyq Mıtropolıt Aleksandrmen kezdesti. Mádenıet mınıstrliginiń búgin taratqan habarlamasy boıynsha, mınıstr qonaqty Mıtropolıttik okrýgtyń basshysy laýazymyna taǵaıyndalýymen jáne Mıtropolıt dárejesine kóterilýimen quttyqtap, Qazaqstan halqynyń ıgiligine baǵyttalǵan jumysyna sáttilik tiledi.
Mıtropolıt Aleksandr Mınıstrge jańa kanonıkalyq qurylymy - Qazaqstan Respýblıkasyndaǵy Pravoslav Shirkeýi Mıtropolıttik okrýginiń qurylǵany týraly habarlady. Sonymen qatar, Almaty eparhıaldyq basqarmasynyń dinı-mádenı ortalyǵyn keńeıtý, Ýspen kafedraldy soborynyń janynda ákimshilik jáne dinı-mádenı ortalyqty salý týraly alǵa qoıylǵan josparlaryn aıtty.
Kezdesý barysynda Mıtropolıttik okrýg jáne QR Mádenıet mınıstrligi arasyndaǵy ózara is-qımyldyń jaǵdaıy men perspektıvalary týraly oı bólisildi. Osy oraıda konfessııaaralyq yntymaqtastyq, jas urpaqtyń rýhanı-ónegeli tárbıesine baǵyttalǵan aǵartýshylyq jáne bilim beretin baǵdarlamalar máselelerine erekshe nazar aýdaryldy.
M.Qul-Muhammed mádenıet, din jáne tilderdi damytý salasyndaǵy júrgiziletin jumys týraly áńgimelep, Mıtropolıt Aleksandr usynǵan birqatar jobalarǵa jan-jaqty qoldaý kórsetýge nıet bildirdi.
