M. Qul-Muhammed: «Astana Opera» teatry kúrdeli qoıylymdardy júzege asyrýǵa múmkindik beretin biregeı óner ordasy bolmaq

Bul týraly búgin QR Úkimetiniń otyrysynda Mádenıet jáne aqparat mınıstri Muhtar Qul-Muhammed málim etti.

Mınıstrdiń atap ótýinshe, teatr jobasynyń avtorlary klassıkalyq arhıtektýralyq sıpatty ulttyq úlgilermen sheber ushtastyryp, oǵan erekshe reńk bergen.

Teatrdyń kólemi - 64 myń sharshy metr. Salystyrý úshin, Kopengagen teatrynyń aýdany 41 myń sharshy metrdi ǵana quraıdy.

Sahnanyń eni 21 metr, al uzyndyǵy 59 metrge deıin jetedi. Taǵy da salystyrý úshin aıta keteıik, Oslodaǵy teatrdyń eni 16 metr, al uzyndyǵy nebári 40 metr ǵana.

Qajet jaǵdaıda daıyn dekoratsııany jyljytýǵa qolaıly qos qaptaly jáne bar. Bul bezendirilýi kúrdeli spektaklderdi qoıýǵa óte yńǵaıly.

Sahnanyń tómengi jaǵynda tereńdigi 12 metrlik kóterip-túsiretin avtomatty qondyrǵylardan turatyn mashınalar zaly ornalasqan.

Teatrda úsh bólikten turatyn jáne 120 mýzykantqa eseptelgen orkestrge arnalǵan arnaıy oryn bar. Kórermender zaly (1250 adamǵa arnalǵan) ulttyq naqyshta óte ásem bezendirilip jasalǵan.

Teatrdyń parteri 450 orynǵa laıyqtalǵan jáne árbir kórermenge yńǵaıly bolýy úshin qatarlar birinen biri sál joǵarylaý ornalasqan.

Teatrda 8 qosymsha zal, 11 repetıtsııalyq oryn, kameralyq mýzykaǵa arnalǵan 250 oryndyq zal, baspasóz-zaly t.b. bar.

Italııanyń eń úzdik mamandary jasaǵan teatrdyń akýstıkasy da erekshe. Sonyń nátıjesinde dybys onyń qaı tusynda bolmasyn anyq estiledi.

Ǵımaratta ornatylǵan osy zamanǵy stýdııalyq qondyrǵy teatrda ótetin barlyq spektaklder men kontsertterdi Eıch Dı múmkindigimen jazýǵa jaǵdaı týǵyzady.

«Dál osy jańalyqtardyń teatr úshin paıdasy asa zor bolmaq. Endi kez kelgen spektakldi bes kameramen bir mezgilde jazyp, sol sátte-aq ony otandyq telearnalardan kórsetýge múmkindik týyndap otyr», - dedi ol.