M. Qoıgeldi: Qazaq handyǵy degenimiz - ulttyq memlekettik degen sóz

ASTANA. QazAqparat - Qazaq handyǵy degenimiz - ulttyq memlekettik degen sóz. Búgin Astanadaǵy Táýelsizdik saraıynda ótip jatqan Qazaq handyǵynyń 550 jyldyǵyna arnalaǵan Saltanatty sharaǵa oraı QazAqparat tilshisine óz pikirin bildirgen belgili tarıhshy Mámbet Qoıgeldi osyndaı pikir bildirdi.

«Qazaq handyǵynyń 550 jyldyǵy - bizdiń ultymyz úshin erekshe data. Qazaq handyǵy degenimiz - ulttyq memlekettik degen sóz. Buǵan deıingi memleketter bizdiń ulan-ǵaıyr dalamyzda paıda bolǵan, ósken, órkendegen. Olar árıne, bizdiń memlekettigimizdiń negizimen úndes. Biraq, bizdiń handar osydan 550 jyl buryn paıda bolǵan memleketke ultymyzdyń atyn berdi, halyq retinde óziniń ornyn anyqtady. Álemdik keńistikte óz kelbetin qalyptastyrdy», - dedi M. Qoıgeldi.

Sonymen qatar, tarıhshy ǵalym sharalardyń Qazaq handyǵymen shektelip qalmaýy kerektigin atap ótti. «Qazaq handyǵynyń táýelsizdigi, memlekettigimizdiń bútindigi úshin kúres bizdiń dalada esh toqtaǵan emes. Arǵyny aıtpaǵanda, bergi Isataı Taımanuly, Kenesary han, odan bergi Alash arystarynyń qozǵalysy - bunyń bári memlekettilik, eldik úshin kúrestiń kórinisi. Sondyqtan da, mundaı sharalar Qazaq handyǵynyń aıasynda shektelip qalmaýy kerek. Qazaq handyǵy degen - qazaq memlekettiligi degen sóz. Handyq úshin kúres - memlekettilik úshin kúres. Ol kúres búgin de jalǵasý ústinde», - dep túıindeıdi Mámbet Qoıgeldi.