ІІM qosymshalar arqyly smartfondarǵa qashyqtan qol jetkizý shemasy týraly eskertti
ASTANA. KAZINFORM – Іshki ister mınıstrligi azamattardyń smartfondaryna zııandy qosymshalardy ornatý arqyly qashyqtan qol jetkizetin alaıaqtyq shema týraly eskertti.
Polisia.kz habarlaýynsha, qazirgi ýaqytta Android operatsııalyq júıesi ornatylǵan mobıldi qurylǵylarǵa zııandy baǵdarlamany ornatyp, taratý jaǵdaılary tirkelip otyr. Qaskóıler ony taratý úshin túrli tásilder qoldanady.
Atap aıtqanda:
- messendjerler men áleýmettik jeliler arqyly fıshıngtik siltemelerdi taratý;
- jalǵan mobıldi qosymshalar;
- foto, beıne jáne qujattar túrinde jasyrylǵan zııandy qosymshalar;
- memlekettik organdar, bankter jáne jetkizý qyzmetteri atynan jiberiletin habarlamalar;
- aktsııaǵa nemese utys oıynyna qatysý syltaýymen qosymsha ornatýdy talap etetin qońyraýlar.
Mundaı baǵdarlama ornatylǵannan keıin alaıaqtar qurylǵyǵa qashyqtan qol jetkizý múmkindigine ıe bolady. Bul shottardaǵy qarajattyń urlanýyna, onlaın-nesıelerdiń rásimdelýine, jeke derekter men hat almasýdyń taralýyna, sondaı-aq telefondy buǵattap, tólem talap etýge ákep soǵýy múmkin.
Ózińizdi qorǵaý úshin úshinshi tulǵalardyń ótinishi boıynsha qosymshalardy ornatpańyz, SMS arqyly kelgen kodtardy eshkimge habarlamańyz, kúmándi siltemelerge ótpeńiz, tek resmı qosymshalardy jáne antıvırýstyq baǵdarlamany paıdalanyńyz, bank operatsııalary týraly habarlamalardy qosyńyz.
Telefonyńyzda qaýipti baǵdarlamanyń bolý belgileri:
- batareıanyń tez taýsylýy
- qurylǵynyń qyzyp ketýi
- beıtanys qosymshalardyń paıda bolýy.
– Kúdik týyndaǵan jaǵdaıda ınternetti dereý óshirińiz, bankpen baılanysyńyz jáne quqyq qorǵaý organdaryna júginińiz. Saq bolyńyz. Tsıfrlyq qaýipsizdik ózimizden bastalady, - dedi ІІM.
Budan buryn elimizde alaıaqtyqtyń basym bóligi sheteldik serverler men VPN arqyly júzege asyrylatynyn jazǵanbyz.