ІІM qonaq úı men páter brondaý kezinde alaıaqtarǵa aldanyp qalmaýǵa shaqyrdy

ASTANA. KAZINFORM — Іshki ister mınıstrligi tanymal ınternet-resýrstarda qonaqúı nómirleri men páterlerdi brondaý kezinde jasalatyn alaıaqtyqtyń jańa tásili týraly eskertti. Bul týraly Polisia.kz jazdy.

— Páterlerdi ınternet arqyly brondaý kezinde paıdalanýshylarǵa bank kartasynyń derekterin suratatyn habarlamalar keledi. Alaıda bul derekter jeke kabınette bar jáne qaıta engizýdi talap etpeıdi, — dep jazdy vedomstvodan.

Osyǵan baılanysty ІІM azamattardy basqa qalaǵa nemese elge demalysqa, sondaı-aq issaparǵa shyqqanda asa muqııat bolýǵa shaqyrady.

Alaıaqtarǵa aldanbas úshin mynadaı sharalardy ustaný qajet:

· saıttyń mekenjaıyn tekserińiz: fıshıngtik saıttarda domen ataýynda usaq ózgerister bolýy múmkin (mysaly, bir áriptiń qosylýy nemese sońǵy jaǵyndaǵy ózgerister;

· bank kartańyzdyń derekterin páter ıesimen chatta bólispeńiz;

· tym tómen baǵadaǵy usynystarǵa kúmánmen qarańyz — bul aldaýdyń belgisi bolýy múmkin; · páterdi nemese qonaqúı nómirin jaldamas buryn pikirlerdi oqyp shyǵyńyz, olardyń jarııalanǵan ýaqytyn jáne jarnamanyń saıtta qansha ýaqyttan beri turǵanyn tekserińiz, birneshe jyldan beri jarnamalanyp kele jatqan páterler — senimdiliktiń bir belgisi;

· páter ıesi tolyq aldyn ala tólem jasaýdy talap etken jaǵdaıda abaı bolyńyz, qonaqúı nómiri men páterge tólemdi tek sol jerge baryp, olardyń bar ekenine kóz jetkizgennen keıin jasańyz; 

· kúdikti habarlamalardan saq bolyńyz: messendjerlerde, elektrondyq poshtada nemese áleýmettik jelilerde jiberilgen siltemeler jalǵan saıttarǵa aparýy múmkin;

· páterdi nemese qonaqúı nómirin tek tanymal jáne senimdi platformalardan brondańyz: eger saıt kúmán týdyrsa, táýekelge barmaǵan durys.

Eske sala keteıik, buǵan deıin ІІM áleýmettik jelidegi alaıaqtar týraly eskertken edi. Jeli qoldanýshylarynyń keıbiri ózderin mahabbat izdep júrgen sheteldikter retinde kórsetetin alaıaqtardyń quryǵyna túsip qalyp jatqany aıtylǵan bolatyn.