ІІM kólikti 5 mınýt qyzdyrǵany úshin jappaı aıyppul salýdy maqsat etpeıdi
ASTANA. KAZINFORM — ІІM kóligin 5 mınýttan artyq qyzdyrǵan júrgizýshilerge jappaı aıyppul salýdy maqsat tutyp otyrǵan joq. Bul jaıynda Májilis depýtattarynyń saýalyna atalǵan vedomstvo basshysy Erjan Sádenovtiń jaýabynda aıtylǵan.
— Quqyq buzýshylyqtardyń basym bóligi Jedel basqarý ortalyqtary kameralarynyń jáne avtomattandyrylǵan júıelermen anyqtalady. Qazaqstan Respýblıkasy Іshki ister mınıstriniń 2023 jylǵy 30 maýsymdaǵy № 534 buıryǵymen bekitilgen Jol júrisi qaǵıdalarynyń 88-tarmaǵynyń 5) tarmaqshasyna sáıkes, eger turǵyndarǵa qolaısyzdyq keltiretin bolsa, eldi mekenderde qozǵaltqyshy jumys istep turǵan mehanıkalyq kólik quraldarynyń toqtap turýyna tyıym salynady. Osyǵan uqsas talap Jol júrisi qaǵıdalary 17-taraýy 122-tarmaǵynyń 4) tarmaqshasynda bar, — dep atap ótedi mınıstr jaýabynda.
Onyń túsindirýinshe, toqtap turý — bul kólik quralynyń júrisin jolaýshylardy otyrǵyzýǵa nemese túsirýge ne kólik quralyn tıeýge nemese túsirýge baılanysty emes sebepter boıynsha bes mınýttan asatyn ýaqytqa ádeıi toqtatý.
— Osylaısha, eger kólik quraly jumys istep turǵan qozǵaltqyshpen bes mınýttan artyq tursa jáne bul turǵyndarǵa qolaısyzdyq týdyrsa Qazaqstan Respýblıkasy 2 ÁQBtK 597-babynyń 1-bóliginde kózdelgen quqyq buzýshylyqtyń quramy qaralatyn bolady. Sonymen qatar ishki ister organdary azamattarǵa osy buzýshylyq úshin jappaı aıyppul salýdy maqsat etip qoımaıdy. Atalǵan bap boıynsha ákimshilik quqyq buzýshylyq týraly is azamattardyń shaǵymdary kelip túsken kezde jáne buzýshylyq týraly dálelder bolǵan kezde ǵana qozǵalatynyn atap ótemiz. Qazirgi ýaqytta Qazaqstan Respýblıkasy ІІM jol qozǵalysy salasyndaǵy normatıvtik quqyqtyq aktilerge ózgeris engizý máselesin qaraýda, — dedi Erjan Sádenov.
Buǵan deıin Petropavl turǵyny kóligin 5 mınýttan artyq jylytamyn dep aıyppul arqalaǵanyn jazǵan edik.