ІІM kólik júrgizýshileriniń masańdyǵyn tekserýdiń jańa erejelerin túsindirdi

ASTANA. KAZINFORM – 16 qyrkúıekten bastap kólik tizgindegen azamattardyń masańdyǵyn tekserýdiń ádisi jańartyldy. Osyǵan oraı ІІM jańa erejelerdi túsindirdi.

Polisia.kz portalynyń habarlaýynsha, bul erejeler Ákimshilik quqyq buzýshylyq kodeksiniń 796-baby boıynsha júrgiziletin ákimshilik óndiristiń aıasynda ǵana qoldanylady. Atalǵan norma basqarý quqyǵynan ýaqytsha aıyrý jáne masań kúıde bolatyn júrgizýshilerdi ǵana tekserýdi kózdeıdi. 

Sondyqtan jańartylǵan erejeler tek kólik quralyn basqarýshylarǵa qatysty. Jaıaý júrginshiler men jol júrisiniń basqa qatysýshylaryna jańa talaptar engizilgen joq.

Sondaı-aq protsedýranyń ózi burynǵy qalpynda qalyp otyr – túpkilikti ózgerister joq. Bir ǵana jańalyq – bekitilgen nysannyń túri: buryn erejeler Úkimet qaýlysymen bekitilgen bolsa, endi olar ІІM buıryǵy arqyly bekitiledi. 

Bul detsentralızatsııa jáne bıýrokratııadan qutylý saıasatynyń aıasynda jasaldy, osylaısha mundaı qujattardy qabyldaý tártibin ońaılatýǵa múmkindik beredi. Sonymen qatar júrgizýshi arnaıy quraldarmen, máselen alkotestermen masańdyq dárejesin tekserýden bas tartýǵa nemese medıtsınalyq uıymynda tekserýdi jalǵastyrýǵa quqyly ekenin eske salamyz.

Óz kezeginde, masańdyqtan tekserýden jaltarý nemese bas tartý QR ÁQBtK-niń 613-babynyń 4-bóliginde kózdelgen ákimshilik is júrgizýdi qozǵaý úshin negiz bolady.

Eske sala keteıik, buǵan deıin joldardy qabyldaý komıssııalaryna polıtsııany qaıta qosý usynylǵanyn habarlaǵan edik.