ІІM qyzmetkerlerine jańa páter kiltteri tabystaldy
ASTANA. KAZINFORM – Qazaqstan ishki ister organdary qyzmetkerleriniń otbasylary úshin erekshe ári qýanyshty sát.
Memleket basshysynyń tapsyrmasy boıynsha Іshki ister mınıstrliginiń baspanaǵa muqtaj qyzmetkerlerine jańa páter kiltteri tabystaldy. Baspanaly bolǵandardyń qatarynda kópbalaly otbasylar jáne el tynyshtyǵy men azamattardyń qaýipsizdigi jolynda uzaq jyldar boıy adal qyzmet etken mamandar bar.
Quqyq qorǵaý organdary qyzmetkerlerin qoldaý jáne olarǵa laıyqty áleýmettik jaǵdaı jasaý — memlekettik saıasattyń basym baǵyttarynyń biri. Bul bastamanyń mańyzyn arttyra túsetin jaıt — mundaı qoldaýdyń jyl saıynǵy ıgi dástúrge aınalýy. Ótken jyly da polıtsııa qyzmetkerleriniń otbasylary kópten kútken baspanalaryna qol jetkizip, qonys toıyn toılaǵan bolatyn.
Bıyl jańa páter kiltteri ІІM-niń 15 qyzmetkerine tabystaldy. Árbir jańa baspananyń artynda jyldar boıǵy jaýapty qyzmet, kúndelikti qajyrly eńbek, joǵary jaýapkershilik pen mamandyqqa degen adaldyq jatyr. Qyzmetkerler úshin bul tek baspana ǵana emes, turaqtylyqtyń, erteńgi kúnge degen senimniń jáne memleket qamqorlyǵynyń aıqyn belgisi.
Jańa páter ıeleriniń biri — ІІM kóshi-qon qyzmeti komıtetiniń erekshe tapsyrmalar jónindegi aǵa ınspektory Aınur Baıgelenova.
Ol ishki ister organdarynda 20 jyldan astam ýaqyt qyzmet etip keledi. Tórt balany tárbıelep otyrǵan ana.
— Іshki ister organdarynda 20 jyldan astam qyzmet etip kelemin. Búgingi tańda eńbegim elenip, otbasymyzǵa jeke baspana berildi. Aldaǵy ýaqytta da qyzmetimdi adal ári jaýapkershilikpen jalǵastyrýǵa daıynmyn, — dedi Aınur Baıgelenova.
ІІM kúzet qyzmetin baqylaý komıteti tóraǵasynyń orynbasary Denıs Rýdkovskıı de memleket tarapynan kórsetilip jatqan qoldaýdyń mańyzyn atap ótti.
— Óz atymnan jáne otbasymnyń atynan Memleket basshysyna, sondaı-aq mınıstrimizge qyzmetkerlerge kórsetip otyrǵan qamqorlyǵy men áleýmettik máselelerdi sheshýdegi naqty qoldaýy úshin shynaıy alǵysymdy bildiremin. Jeke páter kiltin alý — ár otbasy úshin úlken qýanysh, turaqtylyq pen bolashaqqa degen senimniń sımvoly, — dedi polıtsııa polkovnıgi.
Mundaı bastamalar qyzmetkerlerdiń áleýmettik máselelerin sheship qana qoımaı, quqyq qorǵaý qyzmetiniń bedelin arttyryp, el qaýipsizdigin qamtamasyz etý jolynda aıanbaı eńbek etip júrgen jandardyń jigeri men senimin nyǵaıta túsedi.
Aıta ketelik Otan qorǵaýshy kúninde áskerı qyzmetshiler baspanaly bolǵan edi.
