ІІM qyzmetke qabyldaý protsesine jasandy ıntellektini engizip jatyr
ASTANA. KAZINFORM — Mınıstrlikte Trust Education Company kompanııasynyń ókili, TrustExam.ai ınnovatsııalyq platformasynyń ázirleýshisi Nurálı Sarbaqyshpen kezdesý ótti, dep habarlaıdy ІІM baspasóz qyzmeti.
Kezdesý barysynda taraptar yntymaqtastyqty damytý jáne ózara is-qımyl týraly memorandýmǵa qol qoıý jóninde ortaq nıet bildirdi.
Іshki ister mınıstrligi men Trust Education Company arasyndaǵy áriptestik kadrlardy irikteý júıesine ıntellektýaldy tehnologııalardy engizýdiń jańa múmkindikterin usynyp, protsestiń ashyqtyǵyn, tıimdiligin jáne senimdiligin qamtamasyz etýge múmkindik beredi.
Eske salsaq, elordada Eýrazııadaǵy iri startap baıqaýy — Astana Hub Battle 2025 fınaly ótti. Ádil qazy alqasynda QR Premer-Mınıstriniń orynbasary — Jasandy ıntellekt jáne tsıfrlyq damý mınıstri Jaslan Mádıev, Telegram negizin qalaýshy Pavel Dýrov jáne basqa da sarapshylar boldy.
Baıqaýda astanalyq Nurálı Sarbaqysh bilim salasynda emtıhannyń ádil ótýin qadaǵalaıtyn TrustExam jobasyn usynǵan edi. Pavel Dýrovtyń arnaıy «Eksponentsıaldy ósim» nomınatsııasynda onyń TrustExam jobasy úzdik dep tanyldy.
Pavel Dýrov jeńimpaz astanalyqty marapattap, onyń qabiletterin erekshe atap ótti.
Óz kezeginde 25 jasar qazaqstandyq Nurálı Sarbaqysh bilim salasynda emtıhannyń ádil ótýin qadaǵalaıtyn jobasy týraly keńirek aıtyp berdi.