ІІM: Qylmys azaıyp, rezonansty isterdiń ashylýy artty
ASTANA. KAZINFORM — Qazaqstanda 2026 jyldyń alǵashqy alty aıynda tirkelgen qylmystar sany 10%-ǵa tómendedi. Іshki ister mınıstrliginiń málimetinshe, osy kezeńde aýyr jáne asa aýyr qylmystardyń ashylýy jaqsaryp, izdeýde júrgen júzdegen qylmysker ustaldy, sondaı-aq birqatar uıymdasqan qylmystyq top pen zańsyz kóshi-qon arnalarynyń qyzmeti toqtatyldy.
Mınıstrliktiń málimetinshe, alty aıdyń qorytyndysy boıynsha Qazaqstanda tirkelgen qylmystar sany 10%-ǵa azaıǵan. Eń kóp taralǵan quqyq buzýshylyqtar boıynsha qylmystardyń ashylý kórsetkishi artqan.
— Іshki ister mınıstrliginiń krımınaldyq polıtsııa departamenti qylmystardyń aldyn alý jáne jolyn kesý boıynsha jumys júrgizýde. Basty mindet — azamattardyń qaýipsizdigin qamtamasyz etý. Alty aıda elimizde qylmystar sany 10%-ǵa tómendedi. Asa aýyr qylmystarmen kúres erekshe nazarda. Kisi óltirý qylmysy 9%-ǵa azaıdy. Ótken jyldardaǵy qylmystardy ashý jumystary jalǵasady. Jyl basynan beri 15 kisi óltirý, 19 aýyr dene jaraqatyn keltirý faktisi, 7 zorlaý jáne 31 buzaqylyq qylmysy ashyldy. Urlyqtar sany 16%-ǵa azaıyp, olardyń ashylý deńgeıi artty. Urlyq jasaǵany úshin bes myńnan astam adam ustalyp, shamamen 600 qylmystyq toptyń qyzmeti toqtatyldy. Mal urlyǵyna qarsy kúres te turaqty baqylaýda. 119 adam ustalyp, 28 qylmystyq toptyń jumysy toqtatyldy. Alty aıda izdeýde júrgen 678 adam ustaldy. Olardyń 90-y shetel aýmaǵynda. 28 qylmysker elge ekstradıtsııalandy, 14 adam deportatsııalandy. Sonymen qatar 362 azamattyń júrgen jeri anyqtaldy. Zańsyz kóshi-qonǵa qarsy is-qımyl jalǵasýda. Pavlodar oblysynda eki zańsyz kóshi-qon arnasy anyqtaldy. Osyndaı qylmystyq shemalar Shymkent qalasy men Mańǵystaý oblysynda da joıyldy. Bul baǵyttaǵy jumys jalǵasýda, — dedi ІІM krımınaldyq polıtsııa departamentiniń bastyǵy Qanat Nurmaǵambetov.
Eske sala keteıik, buǵan deıin Qylmysqa jol ashqan áreketsizdigi úshin 2 myńnan astam laýazymdy tulǵa jaýapkershilikke tartylǵanyn jazdyq.
