ІІM Qazaqstanda alaıaqtyqtyń jańa tásili taralyp jatqanyn eskertti
ASTANA. KAZINFORM – Qazaqstanda alaıaqtyqtyń jańa túri tirkelip jatyr. Bul týraly Іshki ister mınıstrligi málimdedi.
Vedomstvonyń málimetinshe, qaskúnemder ózderin túrli kompanııalardyń, memlekettik organdardyń jáne joǵary oqý oryndarynyń basshylary retinde tanystyryp, azamattardy aldaýdyń jańa shemasyn qoldana bastaǵan.
Alaıaqtar jalǵan akkaýnttar men bóten nómirlerdi paıdalanyp, qyzmetkerlerge telefon arqyly nemese messendjerler arqyly habarlasady. Olar derekterdiń taralýy nemese qarjynyń urlaný qaýpi bar ekenin aıtyp, jaǵdaıdy ádeıi kúrdelendirip kórsetedi. Sonymen qatar jedel áreket etýdi talap etip, psıhologııalyq qysym jasaıdy.
Odan keıin azamattarǵa “mamandar” nemese “quqyq qorǵaý organdarynyń qyzmetkerleri” habarlasatyny eskertiledi. Alaıaqtar olardyń nusqaýlaryn sózsiz oryndaýdy talap etedi.
Nátıjesinde kúdiktiler adamdardy aqshasyn sheship alyp, ony “qaýipsiz shottarǵa” aýdarýǵa kóndiredi. Qarajat qolǵa túsken soń, baılanys birden úziledi.
ІІM dereginshe, alaıaqtar zamanaýı tehnologııalardy da belsendi qoldanady. Atap aıtqanda, nómirdi aýystyrý, daýysty ózgertý sııaqty tásilder arqyly azamattardyń senimine kirip, qyraǵylyǵyn tómendetýge tyrysady.
– Bankter men memlekettik organdardyń qyzmetkerleri eshqashan telefon arqyly aqsha aýdarýdy talap etpeıdi, – dep eskertti mınıstrlik.
Vedomstvo azamattardy beıtanys adamdardyń nusqaýlaryn oryndamaýǵa, kez kelgen aqparatty tek resmı derekkózder arqyly tekserýge jáne kúmándi jaǵdaı týyndasa, dereý quqyq qorǵaý organdaryna júginýge shaqyrdy.
Aıta keteıik, alaıaqtyq jolmen alynǵan qarajatty dropper arqyly aınalymǵa shyǵarý shemasy áshkerelendi.
