ІІM: Qaýipti prankter – óner emes, zań buzýshylyq

ASTANA. KAZINFORM - Іshki ister mınıstrligi áleýmettik jelilerde prank pen ekstremaldy áreketterdi beıneleıtin vıdeolar túsiretin azamattarǵa úndeý jasady, dep habarlaıdy Polisia.kz.

— Qurmetti azamattar! Sońǵy ýaqytta ınternette prank pen qaýipti trıýkterdi kórsetetin vıdeolar jıilep ketti. Bul «haıp» pen «qaralym qýǵan» áreketter ázil sheńberinen asyp, qoǵamdyq tártip pen azamattardyń qaýipsizdigine qaýip tóndirýde, — dedi ІІM resmı ókili Shyńǵys Alekeshev.

Mınıstrlik agressııa, arandatý, zorlyq-zombylyq elementteri bar kontentke jol berilmeıtinin jáne mundaı áreketter úshin ákimshilik jáne qylmystyq jaýapkershilik qarastyrylǵanyn eskertti.

2025 jyldyń basynan beri osyndaı prankterge baılanysty 24 adam ákimshilik jaýapqa tartylǵan. Máselen:

• Astanada blogerler lıft ishinde «máıit» tasyp, baltamen shabýyl jasaǵan kórinis uıymdastyrǵan. Bul áreket jolaýshylardyń úreıin ushyryp, nátıjesinde qatysýshylar 15–30 táýlikke ákimshilik qamaýǵa alynǵan.

• Almaty oblysynda ekstremaldy vıdeo túsirmek bolǵan jas jigit jolda kele jatqan kóliktiń ústinen sekirip, aýyr jaraqat saldarynan kóz jumǵan.

ІІM bul áreketterdiń qoǵamdyq moralǵa saı kelmeıtinin, adamdarǵa psıhologııalyq zaqym keltiretinin jáne oryndaýshylardyń óz ómirine de qaýip tóndiretinin atap ótti.

— Blogerlik pen kameraǵa túsirý quqyq buzýǵa syltaý bolmaýy tıis. Qatygez prankter — bul óner emes, zań buzýshylyq. Beıne túsirmes buryn onyń saldaryn oı eleginen ótkizińiz. Ómirde de, ınternette de ózgelerdiń quqyǵy men qaýipsizdigine qurmetpen qarańyz, — dedi ІІM ókili.

Mınıstrlik azamattardy zańdy saqtaýǵa jáne qoǵamǵa qaýip tóndiretin áreketterden aýlaq bolýǵa shaqyrady.

Buǵan deıin Astanada prank jasaǵan blogerler qamaýǵa alynǵanyn jazǵanbyz.