ІІM qarjy qyzmetkerlerin jańa alaıaqtyq shemasy týraly eskertti
ASTANA. KAZINFORM – Іshki ister mınıstrligi uıymdardyń qarjy qyzmetkerlerine baǵyttalǵan alaıaqtyqtyń jańa tásili paıda bolǵanyn eskertti, dep habarlaıdy Polisia.kz.
Mınıstrliktiń málimetinshe, alaıaqtar Telegram messendjeri arqyly habarlasyp, ózderin memlekettik organdardyń, kompanııalar men uıymdardyń basshylary retinde tanystyrady. Bul úshin olar shynaıy basshylardyń fotosýretteri men jeke derekterin paıdalanady.
Qaskóıler dırektordyń nemese basqa da laýazymdy tulǵanyń atynan qyzmetkerlerge shuǵyl túrde belgili bir esepshotqa aqsha aýdarýdy, qyzmet aqysyn tóleýdi, taýar úshin qarajat jiberýdi nemese ózge de qarjylyq operatsııalardy oryndaýdy talap etetin habarlamalar jiberedi.
Mundaı habarlamalar kóbine býhgalterlerge, qarjy qyzmetkerlerine jáne uıym qarajatyna qol jetkize alatyn basqa da tulǵalarǵa joldanady.
– Eger osyndaı habarlama alsańyz, aqsha aýdarmańyz jáne eshqandaı qarjylyq operatsııa jasamańyz. Mindetti túrde basshymen telefon arqyly nemese jeke baılanysyńyz. Telefon nómirin, jiberýshiniń akkaýntyn jáne habarlama mazmunyn muqııat tekserińiz. Kúmán týyndaǵan jaǵdaıda hat almasýdy toqtatyp, bolǵan jaǵdaı týraly basshylyqqa jáne jaýapty qyzmetkerlerge habarlańyz, – dep eskertti ІІM.
Vedomstvo azamattardy saq bolýǵa shaqyryp, qyraǵylyq tanytý qarjyny saqtap qalýǵa jáne alaıaqtyqtyń aldyn alýǵa kómektesetinin atap ótti.
Aıta keteıik, Qazaqstandyqtarǵa áleýmettik ınjenerııaǵa negizdelgen alaıaqtyq týraly eskertý jasaldy.
