ІІM: Qaraǵandy oblysynda Uıymdasqan qylmysqa qarsy kúres basqarmasy eki qylmystyq topty ustady
QARAǴANDY. KAZINFORM – Іshki ister mınıstrligi óńirlerdegi kásiporyndarǵa qylmystyq toptardyń yqpal etýine jol bermeý, sondaı-aq baǵaly metaldardy, materıaldyq qundylyqtardy urlaýmen aınalysatyn topty ustaýǵa baǵyttalǵan arnaıy operatsııa júrgizdi. Bul týraly Polisia.kz jazdy.
14 mamyrda Qaraǵandy oblysynda uıymdasqan qylmysqa qarsy kúres basqarmasynyń qyzmetkerleri júıeli túrde materıaldyq-tehnıkalyq quraldar men janar-jaǵarmaı materıaldaryn urlaýmen aınalysqan qylmystyq topty ustady. Olar qorǵasyn-myrysh kenin óndirý jáne óńdeý salasyndaǵy iri kásiporynnan urlyq jasaǵan.
Tergeý barysynda kórsetilgen kásiporynnyń birneshe qyzmetkeri kúzetshilermen sóz baılasyp, birneshe aı boıy urlyq jasap, urlanǵan zattardy zańsyz qabyldaý pýnktine ótkizgeni anyqtaldy.
— Júrgizilgen sharalardyń nátıjesinde 18 adam qylmys ústinde ustaldy. Urlanǵan janar-jaǵarmaı men metall buıymdary jáne avtotehnıkaǵa arnalǵan qosalqy bólshekter tárkilendi. Sondaı-aq tintý barysynda tirkelmegen bes myltyq, onyń ishinde kesilgen jáne oıyq uńǵyly karabın, travmatıkalyq qarý men oq-dáriler tárkilendi, — dedi ІІM uıymdasqan qylmysqa qarsy kúres departamentiniń ókili Qýandyq Alpys.
21 mamyrda atalǵan óńirdiń turǵyndarynan quralǵan baǵaly metaldardyń zańsyz aınalymyna qatysy bar taǵy bir qylmystyq toptyń áreketi toqtatyldy. Tintý sharalary barysynda shamamen 17 tonna mys kontsentraty, kendi qaıta óńdeýge arnalǵan jabdyqtar, ártúrli qujattar men aqsha alyndy.
— Barlyq faktiler boıynsha sotqa deıingi tergeý amaldary júrgizilip jatyr. Ustalǵandar basqa da qylmystarǵa qatystylyǵy boıynsha tekserilýde. Bul baǵyttaǵy jumys jalǵasýda, — dedi Qýandyq Alpys.
Eske sala keteıik, buǵan deıin Óskemende er adamdy uryp óltirip, máıitin aýrýhanaǵa tastap ketkender ustaldy.