ІІM kámeletke tolmaǵandardy esirtki qylmysyna tartýǵa qarsy baqylaýdy kúsheıtti
ASTANA. KAZINFORM — Polıtsııa jyl basynan beri esirtki qylmystaryna qatysy bar 49 kámeletke tolmaǵan jasóspirimdi ustady, dep habarlaıdy Polisia.kz.
Іshki ister mınıstrligi «Zań men tártip» qaǵıdaty aıasynda esirtkiniń zańsyz aınalymyna qarsy júıeli jumysyn jalǵastyryp keledi, sonyń ishinde kámeletke tolmaǵandardy zańsyz áreketterge tartýǵa jol bermeý sharalary kúsheıtildi.
Polıtsııa jyl basynan beri esirtki qylmystaryna qatysy bar 49 kámeletke tolmaǵan jasóspirimdi ustady. Tek tamyz aıynda ǵana jasóspirimderdiń ustalýyna baılanysty 6 derek tirkeldi, onyń ishinde bireýi — esirtki qoldanǵany úshin. Máselen, Abaı oblysynda 16 jastaǵy kolledj stýdenti men onyń 15 jastaǵy tanysy — mektep oqýshysy ustaldy. Jeke tintý barysynda kámeletke tolmaǵan qyzdan asa iri kólemde sıntetıkalyq esirtki zattary tárkilendi. Belgili bolǵandaı, stýdent esirtkini jasyryn qoıyp ketýshi bolyp jumys istegen. Ustalǵan sátinde ol esirtkini mektep oqýshysynyń sómkesine tyǵyp, taratýdy kózdegen. Shymkent qalasynda da ártúrli ýaqytta 17 jastaǵy eki jasóspirim ustaldy. Olar da jasyryn qoıyp ketýshi retinde esirtki taratýǵa qatysqan.
Mundaı jaǵdaılar úlken alańdaýshylyq týǵyzady. Osyǵan baılanysty ІІM ata-analarǵa, pedagogtarǵa jáne kámeletke tolmaǵandardy tárbıeleýge jaýapty tulǵalarǵa úndeý jasaıdy:
- jasóspirimderdiń minez-qulqyndaǵy ózgeristerge mán berińizder;
- olar kimmen aralasatynyn jáne ýaqytty qaıda ótkizetinin baqylańyzdar;
- telefondaryn, messendjerlerin kúmándi hat-habarlar bar-joǵyna tekserip otyryńyzdar;
- balalarmen esirtki qoldanýdyń qaýipteri men saldary týraly jıi sóılesińizder.
— Esirtki taratý úshin zańnamada 5 jyldan 20 jylǵa deıin bas bostandyǵynan aıyrý jazasy kózdelgen. Іshki ister mınıstrligi óskeleń urpaqty qorǵaý jáne azamattardyń qaýipsizdigin qamtamasyz etý boıynsha júıeli jumysyn jalǵastyra beredi, — delingen habarlamada.
Osyǵan deıin habarlanǵandaı, Qazaqstanda kisi óltirý, qaraqshylyq, tonaý, buzaqylyq, urlyq jáne mal urlyǵy azaıdy.