M.Isahan - Búlikshilerdiń áreketine ımamdardy kinálaý - orynsyz (FOTO)

ASTANA. QazAqparat - Búlikshilerdiń áreketine ımamdardy kinálaý - orynsyz. Bul týraly QR MSM Din isteri komıteti Din máselelerin zertteý jáne taldaý ortalyǵy Islamdy zertteý bóliminiń basshysy Muhan Isahan Ǵulamalar keńesiniń kezekten tys otyrysynda atap ótti.

Belgili dintanýshy ǵalym Muhan Isahan ımamdar jat aǵymmen aǵartýshylyq baǵytta talmaı jumys jasap kele jatqanyn jetkizdi, dep habarlaıdy QMDB baspasóz qyzmeti.

«Aqtóbedegi jaǵdaı barlyǵymyzdyń janymyzǵa batyp otyr. Búlikshilerdiń áreketine ımamdardy kinálaý - orynsyz. Qaı turǵydan alyp qarasaq ta ımamdar qorǵansyz. Bul baǵyttaǵy jumysqa Dinı basqarmamen qosa, eń birinshi, quqyq qorǵaý organdary da jaýapty. Din qyzmetkerli jat aǵymmen aǵartýshylyq baǵytta úzdiksiz jumys jasap keledi», - dep atap ótti Muhan Isahan.

Basqosý barysynda ǵulamalar Aqtóbede oryn alǵan lańkestik oqıǵaǵa baılanysty ÚNDEÝ qabyldap, eldegi dinı ahýaldyń jaıy, din mamandarynyń dinı turaqtylyqty qamtamasyz etý joly jáne qoǵamnyń dinı saýattylyǵyn kóterý jaıy talqylandy.