ІІM ınternet-alaıaqtardyń jańa ádisin áshkereledi

ASTANA. KAZINFORM — Sheteldik derekkózderdiń málimetinshe, ınternet-alaıaqtar messendjerler men SMS arqyly «ótkizip alǵan jetkizilim» týraly jalǵan habarlamalardy jappaı taratyp jatyr, dep habarlaıdy QR Іshki ister mınıstrliginiń baspasóz qyzmeti.

Alǵash qaraǵanda mundaı habarlamalar zııansyz bolyp kórinedi jáne kýrerlik qyzmetterdiń standartty eskertýlerine uqsaıdy. Habarlamada kýrerdiń sálemdemeni jetkize almaǵany jáne jetkizilimdi qaıta rásimdeý úshin silteme arqyly ótý qajet ekeni kórsetiledi.

— Alaıda kórsetilgen silteme paıdalanýshyny logıstıkalyq kompanııalardyń resmı saıttaryna uqsatyp jasalǵan jalǵan ınternet-resýrstarǵa baǵyttaıdy. Mundaı saıttarda azamattardan jeke málimetterin (aty-jóni, JSN, turǵylyqty mekenjaıy), sondaı-aq jetkizilimdi qaıta rásimdeý úshin az kólemde tólem jasaý talap etiledi. Atalǵan málimetterdi engizip, tólem jasaǵannan keıin qaskóıler azamattardyń qupııa jáne bank derekterine qol jetkizedi. Bul qarjylyq shyǵyndarǵa ǵana emes, derbes derekterdiń keıinnen zańsyz maqsatta paıdalanylýyna ákelýi múmkin, — deıdi tártip saqshylary.

Osyǵan baılanysty azamattarǵa kelesi qaýipsizdik sharalaryn saqtaý usynylady:

— eger siz eshqandaı jetkizip berýdi kútpeseńiz, kúmándi habarlamadaǵy siltemelerge ótpeńiz;

— saıttyń mekenjaıyn muqııat tekserińiz — alaıaqtyq resýrstar kóbine bir-eki tańbamen ǵana erekshelenedi;

— kúmándi saıttarǵa jeke jáne bank derekterin engizbeńiz;

— jetkizip berý mártebesin tek resmı saıttar men qosymshalar arqyly tekserińiz;

— kúmándi habarlamalardy elemeı, buǵattańyz.

Vedomstvo atap ótkendeı, tsıfrlyq qaýipsizdik talaptaryn saqtaý — qarjylyq shyǵyndar men jeke derekterdiń taralýynan qorǵanýdyń eń tıimdi joly.

Osyǵan deıin alaıaqtyq jasaǵan Qazaqstan azamaty Reseıden ekstradıtsııalanǵany anyqtaldy.